FDને બદલે તગડું ડિવિડન્ડ આપતા શેરોમાં રોકાણ કરો

રિટેલ ઇન્વેસ્ટર્સ વોલેટિલિટીને કારણે શેરોમાં રોકાણ કરતાં ખચકાય છે. એટલે જે બેન્ક એફડી અને નાની બચત યોજનાઓ લોકપ્રિય છે. જ્યારે કુલ ઘરગથ્થુ બચતમાં શેર રોકાણનો હિસ્સો પાંચ ટકાથી પણ ઓછો છે. જોકે, કેટલાક શેરોએ આકર્ષક વળતરની સાથે નફાનો મોટો હિસ્સો ડિવિડન્ડ સ્વરૂપે વહેંચ્યો છે.

અમે એવી કંપનીઓને અલગ તારવી છે જેણે છેલ્લાં 10 વર્ષમાં ચોખ્ખા નફાના ૨૫ ટકા કરતાં વધુ હિસ્સાની વહેંચણી ડિવિડન્ડ તરીકે કરી હોય. બીએસઇ 500 ઇન્ડેક્સની માત્ર ૩૮ કંપનીઓ આ માપદંડના આધારે પસંદ થઈ શકી છે. જેમાંથી અમુક કંપનીઓએ જ સમીક્ષા હેઠળનાં 10 વર્ષમાંથી ઓછામાં ઓછાં ૭ વર્ષ સેન્સેક્સ કરતાં વધુ વળતર આપ્યું છે. સૂચિત ગાળામાં સેન્સેક્સ વાર્ષિક 17 ટકાના ચક્રવૃદ્ધિ દરે વધ્યો છે. જ્યારે સમીક્ષા હેઠળના શેરોએ સરેરાશ વાર્ષિક 38 ટકાનું વળતર આપ્યું છે. રિટર્ન ઉપરાંત, આ શેરોની ડિવિડન્ડ યીલ્ડ પણ ઘણી ઊંચી રહી છે.

આગામી સમયમાં પણ આ કંપનીઓ ઊંચું ડિવિડન્ડ ચૂકવતી રહેશે? કેટલીક કંપનીઓની મેનેજમેન્ટ પોલિસી પ્રમાણે તેમણે વાર્ષિક નફાનો અમુક હિસ્સો ડિવિડન્ડ તરીકે ચૂકવવાનો હોય છે. એટલે આવા શેરોમાં રોકાણકારોને નિયમિત આકર્ષક ડિવિડન્ડની ખાતરી મળે છે.

તમે આવી કેટલીક કંપનીઓમાં લાંબા સમય સુધી રોકાણ કરશો તો નિવૃત્તિમાં તમને સારી આવક મળી રહેશે. જોકે, આ શેરોની ડિવિડન્ડ યીલ્ડ ઊંચી નથી. ડિવિડન્ડ યીલ્ડ એટલે શેરના બજાર ભાવના પ્રમાણમાં ડિવિડન્ડની ટકાવારી. આપણે જે શેરોની ચર્ચા કરી રહ્યા છીએ તેમાં ચોખ્ખા નફાના પ્રમાણમાં ડિવિડન્ડની ચુકવણી ઊંચી છે, પરંતુ આ શેરોનો ભાવ ઘણો વધારે હોવાથી તેમની યીલ્ડ નીચા સ્તરે છે.

ઉપરાંત, આ કંપનીઓનો પીઇ 40-50ની આસપાસ હોવાથી તેને વેલ્યૂ પિક પણ કહી શકાય નહીં. કેટલાક શેરોમાં તો ટૂંકાથી મધ્યમ ગાળાની દૃષ્ટિએ વૃદ્ધિનો ખાસ અવકાશ નથી. તમારો રોકાણનો ગાળો માત્ર બે વર્ષ હોય તો આ શેરોમાં રોકાણ હિતાવહ નથી. જોકે, લાંબા ગાળે વળતર મેળવવું હોય તો આ શેરોના ઊંચા ભાવને જોઈને રોકાણ કરવાનું ટાળશો નહીં.

<a target="_blank" href="http://netspiderads2.indiatimes.com/ads.dll/clickthrough?slotid=36120"><img alt="Advertisement" height="48" width="462" border="0" src="http://netspiderads2.indiatimes.com/ads.dll/photoserv?slotid=36120"></a>