બિટકોઇનનો શેરબજાર પર પ્રવેશ: ભાવ $18,000

ન્યૂ યોર્ક:ક્રિપ્ટોકરન્સી બિટકોઇને સોમવારે એક અગ્રણી શેરબજાર પર પ્રવેશ કર્યો હતો. શિકાગો બોર્ડ ઓપ્શન્સ એક્સ્ચેન્જ પર એક યુનિટ દીઠ 15,000 ડોલરના ભાવે બિટકોઇનનું ઓપનિંગ થયું હતું. 17 જાન્યુઆરીએ સેટલમેન્ટ માટેના કરન્સીનો ભાવ વધીને 15,940 ડોલર થયો હતો.

ફ્યુચર કોન્ટ્રાક્ટ એ નાણાકીય પ્રોડક્ટ છે જેમાં રોકાણકારો એ બાબત પર સટ્ટો રમે છે કે કરન્સી પ્રાઇસ વધશે કે ઘટશે. બિટકોઇનમાં રોકાણ કરવા માટે પ્રોફેશનલ રોકાણકારો માટે આ પ્રથમ તક છે. ઘણા રોકાણકારો બિટકોઇનને સ્વીકારતાં ગભરાય છે કારણ કે તેને કોઈ સેન્ટ્રલ બેન્કનો ટેકો નથી અને કોઈ કાનૂની એક્સ્ચેન્જ રેટ નથી. ટ્રેડિંગની શરૂઆતની 20 મિનિટમાં વોલેટિલિટી હતી.

17 જાન્યુઆરીએ પૂરા થતા ફ્યુચર કોન્ટ્રાક્ટ માટે એક તબક્કે ભાવ 18,000 ડોલરે પહોંચી ગયો હતો. વેડબુશ સિક્યોરિટીઝના ફ્યુચર્સ મેનેજર બોબ ફિત્સીમોનોસે જણાવ્યું કે પ્રથમ કેટલીક મિનિટોમાં 150 ટ્રેડ થયા હતા. પ્રિ-ઓપનિંગ ટ્રેડમાં આ ભાવ 15,250 ડોલર હતો.