UK નરમ પડ્યું : હાઈ કમિશનર મોદીને મળશે

બ્રિટનની કોમનવેલ્થ ઓફિસે જણાવ્યું છે કે તેના ઉચ્ચાયુક્ત ( હાઈ કમિશનર ) મુખ્યમંત્રી નરેન્દ્ર મોદી અને અન્ય વરિષ્ઠ હસ્તીઓને મળવા ગુજરાત જશે અને ગુજરાત સાથે બ્રિટનના સંબંધ કઈ રીતે આગળ વધારવા તે અંગે ચર્ચા કરશે .

યુકે સરકારનો આ નિર્ણય જે સમયે લેવાયો છે તે મહત્ત્વપૂર્ણ છે કારણ કે મુખ્યમંત્રી નરેન્દ્ર મોદીના વધતા રાજકીય કદ વિશે રાજદ્વારી વર્તુળો પણ નોંધ લઈ રહ્યા હોવાના તેમાંથી સંકેત મળે છે . 2002 માં ગુજરાતમાં કોમી રમખાણો બાદ બ્રિટને નરેન્દ્ર મોદી સાથે સંબંધ કાપી નાખ્યા હતા . અમેરિકાએ પણ મોદીને વિઝા આપ્યા ન હતા .

યુકેની વિદેશ કચેરીના નિવેદનમાં જણાવાયું હતું કે ગુજરાતમાં યુકે વિશાળ હિત ધરાવે છે . ગુજરાતની આર્થિક તેજી માટે મોદીના આર્થિક ઉદારીકરણ અને રોકાણ માટેના પગલાને શ્રેય અપાય છે .

યુકે વિદેશ કચેરીના પ્રવક્તાએ કહ્યું હતું કે , અમે ગુજરાતમાં કામ કરતા કે મુલાકાત લેતા બ્રિટિશ નાગરિકોને અને યુકેમાં રહેતા ગુજરાતીઓને શ્રેષ્ઠ ટેકો પૂરો પાડવી માંગીએ છીએ . ભારત સાથેના સંબંધ મજબૂત બનાવવાના ભાગરૂપે આ મુલાકાત યોજવામાં આવી રહી છે .

નિવેદનમાં 2002 નાં કોમી રમખાણોનો ઉલ્લેખ કરાયો હતો અને જણાવાયું હતું કે , તેનાથી હિંસામાં માર્યા ગયેલા બ્રિટિશ નાગરિકોના પરિવારોને ન્યાય અપાવવામાં મદદ મળશે . અમે રાજ્યમાં માનવ અધિકાર અને સારા વહીવટને ટેકો આપવા માંગીએ છીએ .

યુકે વિદેશ ઓફિસના નિવેદન બાદ મોદીએ ટ્વિટર પર લખ્યું હતું , દેર આયે , દુરસ્ત આયે . હું ગુજરાત સાથે સંબંધ ગાઢ બનાવવાના યુકે સરકારનાં પગલાંને આવકારું છું . ઈશ્વર મહાન છે . તેમની સત્તાવાર વેબસાઇટ પર જણાવાયું હતું કે મોદીના નેતૃત્વમાં છેલ્લાં 11 વર્ષમાં રાજ્યએ પ્રગતિ કરી તેની યુકેએ નોંધ લીધી છે