રોકડિયા પાકની કમાણી MFs, રિયલ્ટીમાં સમાણી

રોકડિયા પાક , અનાજના ઊંચા ભાવ અને રોજગાર ગેરંટી યોજનાના કારણે ગ્રામ્ય આવકમાં વધારો થતા ખેડૂતો પણ મ્યુચ્યુઅલ ફંડ , વીમા , રિયલ એસ્ટેટ અને કોમોડિટી ફ્યુચર્સમાં રોકાણ કરતા થયા છે . તેના કારણે નાણાકીય સર્વિસ કંપનીઓ માટે તક સર્જાઈ છે .

રોકાણ માટે સોના અને ચાંદીને હજુ પણ પ્રાથમિકતા મળે છે , પરંતુ વધુને વધુ ખેડૂતો નાની બચતથી દૂર જઈ રહ્યા છે .

તેના માટે વિવિધ કારણો જવાબદાર છે . પશ્ચિમ બંગાળમાં ગ્રામ્ય વિસ્તારમાં ચિટ ફંડ લોકપ્રિય બન્યા છે જ્યારે પંજાબના ધનાઢ્ય ખેડૂતો ચંદીગઢ જેવા શહેરોમાં કોમર્શિયલ પ્રોપર્ટી ખરીદવામાં નાણાં રોકી રહ્યા છે .

આઈઆઈએમ - અમદાવાદના સેન્ટર ફોર મેનેજમેન્ટ ઇન એગ્રીકલ્ચરના ચેરમેન વિપુલ પૌલે જણાવ્યું હતું કે , કપાસ , હોર્ટિકલ્ચર અને ફુલોની ખેતી જેવા રોકડિયા પાકમાં વળતર વધતા ખેડૂતો રિયલ એસ્ટેટ , સોનું અને અમુક અંશે રિયલ એસ્ટેટમાં રોકાણ કરવા લાગ્યા છે .

ખેડૂતોએ જણાવ્યું હતું કે મહાત્મા ગાંધી રાષ્ટ્રીય ગ્રામીણ રોજગાર ગેરંટી યોજનાના કારણે તેમના પરિવારો રોકાણ માટે નાણાં કમાઈ રહ્યા છે . ઓરિસ્સાના એક 67 વર્ષીય ખેડૂત તાપસ મોહંતી જણાવે છે કે , મારો પુત્ર નરેગા સ્કીમ હેઠળ કામ કરે છે અને તે તેની આવકનો અમુક હિસ્સો મ્યુચ્યુઅલ ફંડમાં રોકે છે .

મ્યુચ્યુઅલ ફંડ ઉદ્યોગ તેના ગ્રાહકોનો બેઝ વધારવા માટે ગ્રામીણ ભારત પર નજર દોડાવી રહ્યો છે . એક જાણીતી ફાઈનાન્શિયલ કંપનીના સીઈઓએ જણાવ્યું હતું કે , બેન્ક સુવિધા ધરાવતા ગામડા અમારા મુખ્ય લક્ષ્યાંક છે અને અમે ત્યાં મ્યુચ્યુઅલ ફંડ અંગે જાગૃતિ વધારી રહ્યા છીએ .

વીમા કંપનીઓ પણ આ ટ્રેન્ડથી ઉત્સાહિત છે . બજાજ આલયાન્ઝ લાઈફ ઇન્શ્યોરન્સના એક વરિષ્ઠ અધિકારીએ કહ્યું હતું કે , ગામડાના લોકો પણ પોતાનો વીમો ઉતરાવવા જાગૃત બન્યા છે અને બાળકોના શિક્ષણ કે લગ્ન માટે ભંડોળ એકત્ર કરવા માંગે છે . અમારા પ્રીમિયમનો 67 થી 70 ટકા હિસ્સો અત્યારે ગ્રામ્ય ભારતમાંથી આવે છે .

કેટલાક ધનાઢ્ય ખેડૂતો કોમોડિટી ટ્રેડિંગમાં પણ સક્રિય થયા છે . પેરાડાઈમ કોમોડિટી એડવાઈઝર્સના સીઈઓ બિરેન વકીલે જણાવ્યું હતું કે , ખેડૂતો કોમોડિટી એક્સ્ચેન્જ પર મરી , સરસવ , એરંડો જેવા ઉચ્ચ મૂલ્ય ધરાવતા પાક વેચીને ઘઉં , જવ , મકાઈ વગેરે ખરીદી રહ્યા છે . તેમને ખેતીનો અનુભવ હોવાથી આ એગ્રો - કોમોડિટીમાં રોકાણ કરવામાં આત્મ વિશ્વાસ હોય છે .

નવા સાધનો તરફ વળતા ખેડૂતોના કારણે બચત યોજનામાં હિસ્સો ઘટ્યો છે . પશ્ચિમ બંગાળમાં ચીટ ફંડ્સ લોકપ્રિય બન્યા છે . ગયા નાણાકીય વર્ષમાં રાજ્યમાં નાની બચતનું પ્રમાણ રૂ .32,000 કરોડથી ઘટીને રૂ .23,000 કરોડ થયું હતું .