બુર્સ પર સસ્તામાં ક્રોસ કરન્સી ફ્યુચર્સમાં ટ્રેડિંગ શક્ય બનશે

પંટરો ટૂંક સમયમાં સ્થાનિક એક્સ્ચેન્જિસ પર ઘણા સસ્તા દરે ક્રોસ કરન્સી ફ્યુચર્સમાં ટ્રેડિંગ કરી શકે તેવી શક્યતા છે. આરબીઆઇ સાથે સંયુક્ત રીતે કરન્સી ડેરિવેટિવ્ઝનું સંચાલન કરતી મૂડીબજારની નિયમનકાર સેબી કરન્સીની પેરમાં તેના ટ્રેડિંગને મંજૂરી આપવા વિચારે છે. હાલમાં ડોલર અને યુરો-રૂપી ફ્યુચર્સમાં ટ્રેડિંગ કરી શકાય છે.

એક અધિકારીએ કહ્યું કે, "અમે નવી પ્રોડક્ટ રજૂ કરવા માંગીએ છીએ અને આરબીઆઇ સાથે ચર્ચા ચાલે છે. એક વાર સેન્ટ્રલ બેન્ક મંજૂરી આપે પછી એક્સ્ચેન્જમાં ડોલર-યુરો, ડોલર-પાઉન્ડ અને ડોલર-યેન જેવી ક્રોસ કરન્સી પેર શરૂ કરી શકાય છે."

કરન્સી ડેરિવેટિવ્ઝનું સેબી અને આરબીઆઇ દ્વારા સંયુક્ત નિયમન કરાય છે. સૌથી પહેલાં તેને એનએસઇ અને અગાઉના એમસીએક્સ સ્ટોક એક્સ્ચેન્જ પર લોન્ચ કરાયા હતા જે અત્યારે એમએસઇઆઇ તરીકે ઓળખાય છે. હાલમાં પંટરો ડોલર, યુરો, યેન અને પાઉન્ડ સામે રૂપિયાની ચાલ કેવી રહેશે તેના અંગે બીએસઇ, એનએસઇ અને એમએસઇઆઇ જેવા બુઅર્સ પર દાવ લઈ શકે છે.

એડમિસિ ફોરેક્સના ડાયરેક્ટર સુરેશ નાયર જેવા કરન્સી બ્રોકરે જણાવ્યું કે આની મંજૂરી મળશે તો ટ્રેડર્સ માટે ટ્રાન્ઝેક્શનનો એક સ્તર ઘટશે અને તેના ખર્ચમાં પણ ઘટાડો થશે. ઉદાહરણ તરીકે યુરો સામે ડોલર કેટલો વધશે તેનો અંદાજ બાંધવો હોય તો ટ્રેડરે પહેલાં રૂપિયો વેચીને ડોલર ખરીદવા પડે. અથવા ડોલર-રૂપીમાં લોંગ કરવું પડે. ત્યાર પછી બીજા તબક્કામાં યુરો વેચીને રૂપિયા ખરીદવા પડે છે. એટલે કે ડોલરમાં લોંગ અને યુરોમાં શોર્ટ થાય છે.

બુઅર્સ નવા ક્રોસ કરન્સી પેર લોન્ચ કરે તો યુરો સામે ડોલર વધશે એવું માનતા ટ્રેડરે ડોલર પર લોંગ જવું જોઈએ અને યુરોમાં શોર્ટ કરવું જોઈએ. તેના કારણે વધારાના પગલાનું બ્રોકરેજ બચી જશે.

ઇન્ડીટ્રેડ ડેરિવેટિવ્ઝ એન્ડ કોમોડિટીઝના હેડ ઓફ કરન્સી હરીશ ગલીપેલીએ જણાવ્યું કે, "ઘણી વાર એવું જોવા મળ્યું છે કે ડોલર રૂપિયા સામે બહુ હિલચાલ દર્શાવતો નથી, પરંતુ યુરો અથવા યેન સામે તીવ્ર મૂવમેન્ટ કરે છે.

કોઈએ ડોલર-યુરો અથવા ડોલર-યેન પર ફ્યુચરનો વ્યૂ લેવો હોય તો તેણે ડોલર-રૂપીમાં લોંગ/શોર્ટ કરવું જોઈએ અથવા યુરો-રૂપીમાં શોર્ટ/લોંગ કરવું જોઈએ."

આરબીઆઇ ખરેખર નવી ક્રોસ કરન્સી પેરને મંજૂરી આપશે તો તેનાથી કરન્સી ડેરિવેટિવ્ઝમાં રસ વધશે અને તમામ એક્સ્ચેન્જિસનું સંયુક્ત ટર્નઓવર વધશે. નિયમનકારો કરન્સી ડેરિવેટિવ્ઝની તરફેણ કરે છે, જેથી નાના અને મધ્યમ કદના ઉદ્યોગને ઓટીસી માર્કેટ કરતાં સસ્તામાં હેજિંગની તક મળે. પરંતુ તેમાં મોટા ભાગે સટ્ટાકીય રમત હોય છે અને કુલ ટર્નઓવરમાં ૬૦ ટકા હિસ્સો પ્રોપ્રાઇટરી ટ્રેડનો હોય છે.