LICના જ રોકાણ સામે તપાસ

નવી દિલ્હી : દેશની સૌથી મોટી વીમા કંપની લાઇફ ઇન્શ્યોરન્સ કોર્પોરેશન ( LIC) એ કેટલીક કંપનીઓમાં કરેલા રોકાણની ‘ પ્રક્રિયામાં ખામી ’ બદલ સરકારે તપાસ શરૂ કરી છે એમ નાણામંત્રાલયના વરિષ્ઠ અધિકારીએ ઇટીને જણાવ્યું હતું .

LIC એ કેટલીક કંપનીના શેર ઊંચા ભાવે ખરીદ્યા હોવાનું અને ખૂબ નીચા ભાવે વેચ્યા હોવાનું બહાર આવ્યા બાદ તેની સામે તપાસ થઈ છે . અધિકારીએ ઉમેર્યું હતું કે , “LIC એ મંત્રાલયને જવાબ આપ્યો છે અને તેના જવાબની ચકાસણી પણ થઈ રહી છે . LIC એક મોટી રોકાણકાર છે અને ઉતાવળે કોઈ પણ નિર્ણય લઈ શકાય નહીં . ”

કેટલીક કંપનીઓની ક્રેડિટ લિમિટ વધારવા માટે લાંચ લેવાના આરોપસર સિન્ડિકેટ બેન્કના ચેરમેન એસ કે જૈનની CBI એ ધરપકડ કર્યાના એકાદ - બે દિવસ બાદ જ LIC ના રોકાણની ખામી બહાર આવી હતી . LIC ના ચીફ વિજિલન્સ ઓફિસરે આ વિશે જવાબ આપવાનું ટાળ્યું હતું .