Translate

BSE-NSE Ticker

Thursday, May 12, 2016

પનામા પછી સેશેલ્સમાં રોકાણના 'રહસ્યો' ખૂલશે

પનામા પછી ધનાઢ્ય ભારતીયો અને એનઆરઆઇ માટે સેશેલ્સના કારણે સમસ્યા વધી શકે છે. ઘણા ધનિક લોકો ઇસ્ટ આફ્રિકાના ટાપુ સેશેલ્સમાં રોકાણ ધરાવે છે અને હવે આ રોકાણ તથા બેન્ક એકાઉન્ટની વિગતો જાહેર થઈ શકે છે.આ લોકો શેલ કંપનીઓમાં ડિરેક્ટર અથવા શેરહોલ્ડર છે. આવી કંપનીઓ ઇન્ટરનેશનલ બિઝનેસ કંપનીઓ અથવા આઇબીસી તરીકે ઓળખાય છે જેઓ સેશેલ્સ કે અન્ય ટેક્સ હેવન દેશોના બેન્ક એકાઉન્ટમાં ફંડ ધરાવે છે.

એક ટેક્સ પ્રોફેશનલે ઇટીને જણાવ્યું હતું કે, "અમને સંભવિત લિક વિશે એલર્ટ કરવામાં આવ્યા છે. મોસેક ફોન્સેકાના કિસ્સામાં પણ આવું જ થયું હતું. એક્ટિવિસ્ટ હેકર્સ અથવા નારાજ કર્મચારીઓએ ફોન્સેકાના ડેટાબેઝમાંથી સેશેલ્સ વિશેની માહિતી ચોરીને લિક કરી હોય તેવી શક્યતા છે. અમને લાગે છે કે આ માહિતી પહેલેથી એકત્ર કરાઇ હશે અને હવે ટૂંક સમયમાં જાહેર થઈ જશે."

પત્રકારોના એક જૂથે પનામા સ્થિત કાનૂની પેઢી મોસેક ફોન્સેકાના ક્લાયન્ટ્સના રોકાણોની માહિતી જાહેર કરી ત્યારથી આ કંપની મિડિયામાં ચમકી છે. એક વરિષ્ઠ વકીલે જણાવ્યા કાયદેસરનું રોકાણ ધરાવતા કેટલાક એનઆરઆઇ તેમની ઓળખ ગુપ્ત રાખવામાં નિષ્ફળ જવા બદલ ફોન્સેકા સામે કેસ કરવાની તૈયારીમાં છે.

ઇટીએ બે ટેક્સ પ્રેક્ટિશનર્સ સાથે વાત કરી હતી. તેમણે કહ્યું કે તેમના ક્લાયન્ટને બીક છે કે આવકવેરા વિભાગ દ્વારા સેશેલ્સમાં તેમના રોકાણ અને ડિરેક્ટરશિપ વિશે તપાસ થઈ શકે છે. આ પ્રેક્ટિશનર્સ હવે કાનૂની બચાવ માટે તૈયારી કરી રહ્યા છે.

ટ્રસ્ટ અને ફાઉન્ડેશન સ્થાપવામાં સેશેલ્સના કાયદા મદદરૂપ છે તથા બેરર શેર્સના કારણે તેના ડિરેક્ટર્સ પોતાની ઓળખ છુપાવી શકે છે. આવી સિક્યોરિટી કોઇ માલિકના નામે હોતી નથી.

પરંતુ સેશેલ્સ પ્રમાણમાં ઓછું મહત્ત્વનું ટેક્સ હેવન છે કારણ કે તે રાજકીય સ્થિરતામાં પાછળ છે. ચાઇનીઝ ધનિકોએ ટેક્સ એવોઇડન્સ ટ્રીટી ટાળીને ઇન્ડોનેશિયામાં રોકાણ કરવા માટે ઘણી વખત સેશેલ્સનો ઉપયોગ કર્યો છે. ભારત સેશેલ્સ સાથે ડિપ્લોમેટિક સંબંધ ધરાવે છે અને તેને ક્રેડિટ લાઇન પૂરી પાડેલી છે. પરંતુ ટેક્સ અંગેની માહિતી માટે બંને દેશો વચ્ચે કોઈ કરા નથી. એક વકીલે જણાવ્યું કે ભારત સેશેલ્સ સાથેના હાલના સંબંધોનો ઉપયોગ કરીને માહિતી કઢાવી શકે છે કે નહીં તે નક્કી નથી. તેમાં કદાચ મોટા લોકોના નામ ન હોય તેવી પણ શક્યતા છે.

અક્ષય તૃતીયાના દિવસે પણ સોનું ના ઝળક્યું

દુષ્કાળની લપેટમાં આવેલા ગ્રામીણ ભારતમાં સોનું ખરીદવા માટે રસ ઘટતાં અક્ષય તૃતીયાએ સોનું ઝળકવામાં નિષ્ફળ રહ્યું હતું. પાછલા વર્ષની તુલનાએ આ વર્ષે સોનાના વેચાણમાં 40 ટકા કરતાં પણ વધારે ઘટાડો નોંધાયો હતો.

સોનાના ભાવમાં 11 ટકાના વધારાના કારણે શહેરી વિસ્તારોમાં તથા મેટ્રો શહેરોમાં વેચાણ ફ્લેટ જળવાઈ રહ્યું હતું. સોમવારે સોનાની કિંમત 10 ગ્રામ દીઠ રૂ.30,200ની આસપાસ હતી જેની સરખામણીએ પાછલા વર્ષે આ દિવસે ભાવ રૂ.27,000 હતો, તેમ જ્વેલર્સ અને બુલિયન ડીલર્સ જણાવે છે.

પૂણે સ્થિત પીએનજી જ્વેલર્સના મેનેજિંગ ડિરેક્ટર સૌરભ ગાંગુલીએ જણાવ્યું હતું કે, "અમે અક્ષય તૃતીયાના દિવસે સારા વેચાણની અપેક્ષા રાખી હતી કેમ કે આ તહેવાર અગાઉ વીક-એન્ડ આવતો હતો. અમારે ત્યાં મુલાકાતી વધ્યા હતા, પરંતુ વેચાણમાં વધારો થયો ન હતો. સોનાના ઊંચા ભાવ સાથે ૪૨ દિવસ ચાલેલી હડતાળ તથા બજારમાં નકારાત્મક વાતાવરણે આ વખતે સોનાના વેચાણ પર અસર કરી હતી. હાલમાં ફક્ત હળવું વજન ધરાવતી જ્વેલરી ચાલી રહી છે."

મૂલ્યની દૃષ્ટિએ જોઈએ તો જ્વેલર્સ થોડી વૃદ્ધિ નોંધાવી શકશે કારણ કે સોનાની કિંમતમાં વધારો થયો છે, પરંતુ વોલ્યુમના સંદર્ભમાં વધારે વૃદ્ધિ નથી. પોપ્લી એન્ડ સન્સના ડિરેક્ટર રાજીવ પોપ્લી જણાવે છે કે, "જે લોકોએ અગાઉ આભૂષણોનું બુકિંગ કરાવ્યું હતું તેમણે અક્ષય તૃતીયાએ ડિલિવરી લીધી હતી.

જોકે, અમે વેચાણમાં મોટો ઉછાળો નોંધાવ્યો નથી. વેચાણ સ્થિર જળવાઈ રહ્યું હતું તથા તે પાછલા વર્ષની અક્ષય તૃતીયાની સમકક્ષ હશે. લોકો પાંચ ગ્રામના સોનાના સિક્કાની વધારે ખરીદી કરી રહ્યા છે."

કોલકાતા સ્થિત સેન્કો ગોલ્ડના મેનેજિંગ ડિરેક્ટર સુવાંકર સેને પણ જણાવ્યું હતું કે, "વોલ્યુમના સંદર્ભમાં જોતાં અમે મોટો ઉછાળો નોંધાવ્યો ન હતો. વધુમાં, આ અક્ષય તૃતીયાએ અમારી મુખ્ય ચિંતા માલના ભરાવાને દૂર કરવાની હતી જે હડતાળના કારણે અમારા શોરૂમ્સ પર ખડકાયો હતો."

જોકે, વર્લ્ડ ગોલ્ડ કાઉન્સિલને આ બાબતનો આનંદ છે કે જ્વેલર્સ દ્વારા બિઝનેસ શરૂ કરવાની સાથે ગ્રાહકોમાં ખરીદીનો રસ પરત ફર્યો છે. વર્લ્ડ ગોલ્ડ કાઉન્સિલના એમડી પીઆર સોમાસુંદરમે જણાવ્યું હતું કે, "અમે માનીએ છીએ કે સોના તરફ ગ્રાહકોમાં રોકાણના એક સાધન તરીકે અભિગમ હકારાત્મક જળવાયો છે તથા સોનાના બજાર માટે લાંબા ગાળાનો ખ્યાલ અકબંધ રહ્યો છે."જ્વેલર્સ માટે ચિંતાની મુખ્ય બાબત એ છે કે, ગ્રામીણ ભારતમાં સોનાની માંગમાં વધારો થઈ રહ્યો નથી જે કુલ વેચાણમાં 60 ટકા હિસ્સો ધરાવે છે.

અંશુ જૈન ભારતમાં NBFC શરૂ કરવાની તૈયારીમાં

ડોએચ્ચ બેન્કના ભૂતપૂર્વ કો-સીઇઓ અંશુ જૈન ભારતમાં નોન બેન્કિંગ ફાઇનાન્સ કંપની લોન્ચ કરવા માટે ભૂતપૂર્વ સહયોગી ભૂપિન્દર સિંઘ સાથે ભાગીદારી કરી રહ્યા છે. ભારતમાં હજુ કરોડો લોકોને બેન્કિંગ સુવિધા મળી નથી જેથી એનબીએફસી માટે બિઝનેસની તક હોવાનું માનવામાં આવે છે.

એનબીએફસી દ્વારા વ્યક્તિઓ, નાનાં અને મધ્યમ સાહસો તથા ઉદ્યોગસાહસિકોને ધિરાણ કરવામાં આવશે અને તે સાન ફ્રાન્સિસ્કો સ્થિત ફિન્ટેક સ્ટાર્ટઅપ સોફીના મોડલ પર આધારિત હશે જેમાં જૈન સલાહકાર છે. જાપાનની સોફ્ટબેન્ક દ્વારા તેને ફાઇનાન્સ કરવામાં આવે તેવી શક્યતા છે જેણે સોફીને પણ આર્થિક ટેકો આપ્યો છે.

એક વ્યક્તિએ કહ્યું કે, "ટેક્‌નોલોજી આ કંપનીનો મુખ્ય આધાર હશે. ભારતમાં ઓછી હાજરી ધરાવતા અને અર્ધવિકસિત ધિરાણ બજારમાં તેને સારી તક તરીકે જોવામાં આવે છે. તે ક્રેડિટ સ્કોર અને આધાર પ્રોજેક્ટના ડેટાના વિશ્લેષણનો ઉપયોગ કરશે."

તેમનો વિચાર SoFiનું દેશી વર્ઝન તૈયાર કરવાનું છે જે 2011માં સોશિયલ ફાઇનાન્સ તરીકે શરૂ થયું હતું. તેમાં સ્ટેન્ફર્ડમાં અભ્યાસ કરવા માંગતા જરૂરિયાતમંદ વિદ્યાર્થીઓને મદદ કરવા માટે ઓનલાઇન પ્લેટફોર્મ લોન્ચ કરવાની યોજના હતી. તેમાંથી તે હવે પૂર્ણ કક્ષાના એનબીએફસીમાં રૂપાંતરિત થઈ છે અને વિદ્યાર્થીઓન સસ્તી લોન, મોર્ગેજ, પર્સનલ લોન અને વેલ્થ મેનેજમેન્ટ સર્વિસનું કામ કરે છે.

જૈને જૂન 2015માં જર્મન બેન્કમાં નફો ઘટવાથી ડોએચ્ચે છોડી હતી. યુરોપિયન બેન્કો દ્વારા બેન્ચમાર્ક રેટમાં કથિત ચેડાંના કારણે કાનૂની ખર્ચ વધી રહ્યો હોવાથી તેમણે ડોએચ્ચ બેન્કમાંથી રાજીનામું આપ્યું હતું. ફેબ્રુઆરીમાં જર્મન નાણાકીય નિયમનકારે ડોએચ્ચ બેન્ક ખાતે સ્પેશિયલ ઓડિટ બંધ કર્યાં હતાં અને જૈનને ગોટાળાના આરોપોમાંથી મુક્તિ અપાવી હતી. પ્રસ્તાવિત એનબીએફસી ભારતમાં નાણાકીય સેવા સેક્ટરમાં જૈનનું પ્રથમ સાહસ હશે.

જૈનનો સંપર્ક કરવામાં આવ્યો ત્યારે તેમણે પોતાના ભાગીદાર સિંઘથી વાત કરવા કહ્યું હતું. સિંઘે આ વિશે ટિપ્પણી કરવાનો ઇનકાર કર્યો હતો. સિંઘ ડોએચ્ચે બેન્કના કોર્પોરેટ બેન્કિંગ બિઝનેસમાં એશિયા પેસિફિક ખાતે કો-હેડ રહી ચૂક્યા છે. તેમણે એક વર્ષ કરતાં ઓછા સમય અગાઉ બેન્ક છોડી હતી. તેઓ નવા સાહસ માટે સ્થાપક સીઇઓ બને તેવી શક્યતા છે જ્યારે જૈન તેમાં મુખ્ય રોકાણકાર હશે. તે SoFiનું ભારતીય વર્ઝન હોવાની શક્યતા છે કારણ કે તેમાં શાખાઓ સ્થાપવી જરૂરી હશે. જોકે, તેમાં મોટા ભાગનો બિઝનેસ ઓનલાઇન થશે.

IPLના નવમા વર્ષે પહેલી ટીમ કમાતી થઈ: KKRનો નફો રૂ.14.15 કરોડ

શાહરૂખ ખાનના 'સ્ટાર પાવર' અને છેલ્લાં કેટલાંક વર્ષમાં ટીમના જોરદાર પ્રદર્શનની મદદથી કોલકાતા નાઇટ રાઇડર્સ (KKR)ની ટીમ નફો કરતી થઈ છે. ટીમ 2014-15માં બીજી વખત ચેમ્પિયન થઈ ત્યારે તેણે IPLની તમામ ટીમમાં સૌથી વધુ આવક મેળવી હતી. 2014માં લોકસભા ચૂંટણીના કારણે અડધી ટુર્નામેન્ટ દેશની બહાર UAEમાં રમાઈ હોવા છતાં KKR નફાકારક બની હતી.

બિઝનેસ રિસર્ચ પ્લેટફોર્મ ટોફલરના જણાવ્યા અનુસાર KKRની કંપની નાઇટ રાઇડર્સ સ્પોર્ટ્સ પ્રાઇવેટ લિમિટેડે 2014-15માં રૂ.168.71 કરોડની આવક મેળવી હતી, જે 2013-14માં રૂ.128.81 કરોડ હતી. તેનો નફો 2014-15માં અગાઉના વર્ષના રૂ.9.18 કરોડથી વધીને રૂ.14.15 કરોડ થયો હતો.

IPLની અન્ય કોઈ ટીમે નફામાં આટલું સાતત્ય દર્શાવ્યું નથી. 2014-15માં નફો કરનારી અન્ય ટીમ માત્ર કિંગ્સ XI પંજાબ હતી. તેણે અગાઉના વર્ષની રૂ.4.35 કરોડની ખોટ સામે રૂ12.76 કરોડનો નફો કર્યો હતો. ટીમની આવક 2014-15માં રૂ.130.05 કરોડ રહી હતી, જે અગાઉના વર્ષે રૂ.103.21 કરોડ હતી.

રજિસ્ટ્રાર ઓફ કંપનીઝ પાસેથી 2014-15 પછીના વર્ષની માહિતી હજુ મળી નથી. ઉલ્લેખનીય છે કે, સ્પોટ-ફિક્સિંગ અને સટ્ટાના આરોપોને પગલે IPLમાં ઘણા વિવાદ થયા હતા. ટુર્નામેન્ટનાં શરૂઆતનાં વર્ષોમાં મોટા ભાગની ટીમને પહેલાં ત્રણ-ચાર વર્ષમાં બ્રેક-ઇવનની ધારણા હતી. જોકે, નવમા વર્ષે પણ ઘણી ટીમો નફો કરી શકી નથી. જેમ કે, મુકેશ અંબાણીની મુંબઈ ઇન્ડિયન્સે 2011, 2012, 2013 અને 2014માં પ્રોત્સાહક આવક મેળવી હતી, પરંતુ આ વર્ષોમાં સતત જીત છતાં તે નફો કરી શકી નથી.

મુંબઈ ઇન્ડિયન્સની માલિક ઇન્ડિયાવિન સ્પોર્ટ્સ પ્રાઇવેટ લિમિટેડે 2014-15માં રૂ.167.75 કરોડની આવક મેળવી હતી. 2013માં ટીમ ટુર્નામેન્ટ જીતી ત્યારે તેની આવક રૂ.220.87 કરોડ હતી. જોકે, હજુ સુધી કંપની નફો કરી શકી નથી. 2014-15માં તેની ખોટ રૂ.3.87 કરોડ રહી છે, જે 2013-14માં રૂ.5.04 કરોડ હતી. 2011થી 2014ના ગાળામાં કોહલી, ગેઇલ અને ડિ વિલિયર્સની ટીમ રોયલ ચેલેન્જર્સ બેંગલોર પણ ખોટમાં હતી.

2014-15માં ટીમે રૂ.30.05 કરોડ અને 2013-14માં રૂ.99.04 કરોડની ખોટ કરી હતી. 2012-13માં તેની ખોટ રૂ.7.85 કરોડ રહી હતી અને આવક પણ રૂ.90ની આસપાસ અટકી હતી.

દિલ્હી ડેરડેવિલ્સની કંપની જીએમઆર પ્રાઇવેટ લિમિટેડની આવક 2014-15માં ઘટીને રૂ.112.86 કરોડ રહી હતી, જે 2013-14માં રૂ.151.22 કરોડ હતી. ટીમનો નફો 2013-14માં રૂ.7 કરોડ હતો, પરંતુ પછીના વર્ષ તેણે રૂ.20.39 કરોડની ખોટ કરી હતી.

ચેન્નાઈ સુપરકિંગ્સ (CSK) અને રાજસ્થાન રોયલ્સની ટીમને બે વર્ષ માટે સસ્પેન્ડ કરાઈ છે. જોકે, એ પહેલાં CSK આવકની રીતે ટોચની ત્રણ ટીમમાં સામેલ હતી. 2014-15માં તેની આવક રૂ.158.51 કરોડ અને 2013-14માં રૂ.166.16 કરોડ રહી હતી. રાજસ્થાન રોયલ્સની આવક 2013માં રૂ.93.38 કરોડ હતી અને ટીમે રૂ.3.84 કરોડની ખોટ કરી હતી.

BCCIની સેન્ટ્રલ પૂલ આવક ઉપરાંત, ટીમ્સની આવકના સૌથી મોટા સ્રોતમાં ઇનામની રકમ અને પર્ફોર્મન્સ બોનસ સામેલ છે. ટીમ્સને ટિકિટના વેચાણ, ટીમની જર્સી પર સ્પોન્સરશિપ, લાઇસન્સિંગ અને મર્ચેન્ડાઇઝિંગમાંથી પણ આવક મળે છે. ટીમ સ્પોન્સરશિપની સરેરાશ આવક રૂ.25-40 કરોડ છે અને ટિકિટના વેચાણમાંથી લગભગ રૂ.20-35 કરોડ મળે છે. ‌ફ્રેન્ચાઇઝીને BCCI તરફથી સેન્ટ્રલ પૂલની રૂ.70-80 કરોડની આવક થાય છે.

JSW સ્ટીલ ટાટા સ્ટીલનો UK બિઝનેસ લેવાની દોડમાં

:ટાટા સ્ટીલની ખોટ કરતી યુકે સ્થિત એસેટ્સ ખરીદવામાં જેએસડબલ્યુ સ્ટીલ આશ્ચર્યજનક રીતે અગ્રણી બિડર તરીકે ઊભરી આવી છે. તેના કારણે બજારને નવાઇ લાગી હતી અને સજ્જન જિંદાલની કંપનીના શેરમાં ઘટાડો જોવાયો હતો.

વેચાણની પ્રક્રિયામાં આગામી રાઉન્ડ માટે જે સાત બિડર્સને શોર્ટ લિસ્ટ કરવામાં આવ્યા છે તેમાં એક જેએસડબલ્યુ સ્ટીલ પણ છે. આ બિઝનેસને પુન:બેઠો કરવાના પ્રયાસોને છોડી દીધા પછી ટાટા સ્ટીલ તેને ખરીદનારાની ઝડપી શોધ કરવા માંગે છે, આ બિઝનેસ તેણે કોરસના ટેકઓવરના ભાગરૂપે ખરીદ્યો હતો જ્યારે ૨૦૦૭માં કોમોડિટીઝની તેજી ટોચ પર હતી.

જેએસડબલ્યુ સ્ટીલના એક પ્રવક્તાએ જણાવ્યું હતું કે, "કંપનીની વૃદ્ધિની વ્યુહરચનાના ભાગરૂપે કંપની ઘણી તકોનું મુલ્યાંકન કરતી હોય છે જેમાં યુકે સ્થિત સ્ટીલ ફેસિલિટીની હાલની તકનો સમાવેશ થાય છે. હાલના તબક્કે આમાં વધારે ઉમેરો કરવો વધારે પડતું વહેલું ગણાશે."

ટાટા સ્ટીલના યુકે બિઝનેસમાં જેએસડબલ્યુ સ્ટીલને રસ છે તેવા સમાચાર બાદ મંગળવારે બીએસઈ સેન્સેક્સ 0.33 ટકા ઊંચકાયો હતો ત્યારે જેએસડબલ્યુ સ્ટીલનો શેર ત્રણ ટકા ગગડ્યો હતો. 31 ડિસેમ્બરના રોજ કંપનીની ચોખ્ખી ડેટ રૂ.39,483 કરોડની હતી.

આ બાબતથી માહિતગાર એક વ્યક્તિએ જણાવ્યું હતું કે, "સાઈકલ બદલાઈ છે અને માન્યતા એવી છે કે અમે તેને નાખી દેવાના ભાવે મેળવીશું. તેને યુકે સરકારનું પ્રોત્સાહન છે તથા તેની સામાન્ય કિંમત જેએસડબલ્યુ સ્ટીલને આ એસેટ તરફ આકર્ષિત કરે છે. જેએસડબલ્યુ સ્ટીલ માટે વધારે ડેટ કે પેન્શનની જવાબદારીની ચિંતા કરવાની જરૂર નથી."

આ ક્ષેત્રમાં અગિયાર હજાર રોજગારી છે જેનું રક્ષણ કરવાના ભાગરૂપે યુકે સરકારે આ બિઝનેસમાં રોકાણકારોને આકર્ષિત કરવા ઘણા પગલાં ભર્યા છે. તે ટાટાના યુકે બિઝનેસના વેચાણમાં ટેકો આપવા માટે 25 ટકા જેવો હિસ્સો ખરીદવા માટે તૈયાર છે તથા ડેટમાં મોટી રાહત આપવાની ઓફર છે.

સંભવિત ખરીદનાર પર ઓછામાં ઓછી અસર આવે તે માટે સરકાર ટાટા સ્ટીલ તથા બ્રિટિશ સ્ટીલ પેન્શન સ્કીમના ટ્રસ્ટી પર પણ કામગીરી કરી રહી છે તથા સંભવિત પણે તેને બિઝનેસથી અલગ કરી શકે. કંપની પર પેન્શનની જવાબદારી 15 અબજ પાઉન્ડ જેવી મોટી છે.ઉલ્લેખનિય છે કે ટાટા સ્ટીલ ફક્ત એક પાઉન્ડમાં તેના લોંગ પ્રોડક્ટ બિઝનેસને ગ્રેબૂલ કેપિટલને વેચવા માટે સહમત થયું છે.

મોરેશિયસના રોકાણ પર 2017થી કેપિ. ગેઈન્સ ટેક્સ લાગશે

મોરિશિયસમાંથી થતી કરચોરી અટકાવવા ભારતે 1 એપ્રિલ, 2017 પછીના શેર વેચાણ પર કેપિટલ ગેઇન્સ ટેક્સ વસૂલવા માટે કરાર કર્યો છે. મોરિશિયસ
સાથે ડબલ ટેક્સેશન એવોઇડન્સ કન્વેન્શન (DTAC) પર હસ્તાક્ષરને પગલે ભારતીય રેસિડન્ટ કંપનીના શેર વેચાણ પર 1 એપ્રિલ, 2017થી 31 માર્ચ 2019ના ગાળામાં નિર્ધારિત દરનો 50 ટકા ટેક્સ લાગશે.

સંપૂર્ણ કેપિટલ ગેઇન્સ ટેક્સ 1 એપ્રિલ, 2019થી લાગુ થશે. ડબલ ટેક્સેશન ટાળવા અને કરચોરી અટકાવવા ભારત અને મોરિશિયસ વચ્ચે મંગળવારે મોરિશયસના પોર્ટ લુઇ ખાતે હસ્તાક્ષર કરાયા હતા.

નાણામંત્રાલયે જણાવ્યું હતું કે, "પ્રોટોકોલને પગલે લાંબા સમયથી થઈ રહેલા કરારના દુરુપયોગની ખામીઓ અને ફંડ્સનું રાઉન્ડ ટ્રિપિંગ દૂર થશે." મહેસૂલ સચિવ હસમુખ અઢિયાએ જણાવ્યું હતું કે, કરારમાં ફેરફારથી વિદેશી રોકાણકારોની ટેક્સ બાબતોમાં સ્પષ્ટતા આવે છે.

ઉલ્લેખનીય છે કે, ભારતે 1983માં માત્ર 13 લાખની વસતી ધરાવતા મોરિશિયસ સાથે ડબલ ટેક્સેશન એવોઇડન્સ કરાર પર હસ્તાક્ષર કર્યા હતા, જે ભારતમાં સીધા વિદેશી રોકાણ (FDI)નો બહુ મોટો સ્રોત બન્યો હતો. ભારત સરકારે ઘણી વખતે કરારની શરતો અંગે ફરિયાદ કરી હતી, કારણ કે રોકાણનો મોટો હિસ્સો વાસ્તવિક વિદેશી રોકાણ ન હતું, પણ ભારતીયો સ્થાનિક ટેક્સ ટાળવા મોરિશિયસ દ્વારા નાણાં દેશમાં લાવતા હતા. આ પ્રક્રિયાને રાઉન્ડ ટ્રિપિંગ તરીકે ઓળખવામાં આવે છે.

મંગળવારે થયેલા કરારનો હેતુ ભારતમાં રોકાણ કરતી મોરિશિયસની કંપનીઓ વાસ્તવિક હોય એ નિશ્ચિત કરવાનો છે. અત્યાર સુધી DTAC હેઠળ મોરિશિયસમાં નોંધાયેલી કંપનીઓને ભારતમાં એસેટ્સના વેચાણમાંથી થયેલો કેપિટલ ગેઇન્સ મોરિશિયસમાં જ કરપાત્ર બનતો હતો. જ્યારે ભારતમાં લાગુ 10 ટકાના શોર્ટ-ટર્મ કેપિટલ ગેઇન્સ ટેક્સને મોરિશિયસમાં મુક્તિ હતી. એટલી આવી કંપનીઓ બંને દેશમાં ટેક્સની ચુકવણીમાંથી છટકી જતી હતી.

Wednesday, April 27, 2016

સોનું ૨૦૧૬ના અંત સુધીમાં ૩૪,૧૯૦ થવાની આગાહી

goldબુલિયન બુલેટિન - મયૂર મહેતા, દુબઈ

વર્લ્ડની ટૉપ-લેવલની કંપનીના ટેક્નિકલ ડિપાર્ટમેન્ટે ચાલુ વર્ષના અંત સુધીમાં સોનાના ભાવ વધીને ૧૪૫૦ ડૉલર એટલે કે ભારતીય માર્કેટમાં ૩૪,૧૯૦ રૂપિયા થવાની આગાહી કરી હતી. અમેરિકન ફેડરલ રિઝર્વની બે દિવસની મીટિંગના આઉટકમ પર  હવે બધાની નજર મંડાયેલી છે. અમેરિકા જૂનમાં ઇન્ટરેસ્ટ-રેટ વધારશે કે કેમ એના સંકેત એપ્રિલની મીટિંગમાં ફેડની કમેન્ટ પરથી નીકળી શકશે એવી બધાને ધારણા છે.

ઇકૉનૉમિક ઇન્ડિકેટર

અમેરિકન ફેડરલ રિઝર્વની બે દિવસની મીટિંગ મંગળવારથી શરૂ થઈ રહી છે. આ મીટિંગમાં ઇન્ટરેસ્ટ-રેટ વધવાના ખાસ કોઈ ચાન્સિસ નથી, પણ ગ્લોબલ ઇકૉનૉમી અને મૉનિટરી પૉલિસી વિશે ફેડની કમેન્ટ સોનાની માર્કેટ માટે બહુ જ મહત્વની બની રહેશે. જપાને નેગેટિવ ઇન્ટરેસ્ટ-રેટ લોન માટે પણ એપ્લાય કરવાનું નક્કી કરતાં ડૉલર શૉર્ટ ટર્મ સુધર્યો હતો. ચીનના ઇકૉનૉમિસ્ટોએ સરકારને આર્થિક બેહાલી માટે ચેતવણી આપી હતી, કારણ કે સરકારી દેવું GDP (ગ્રોસ ડોમેસ્ટિક પ્રોડક્ટ)ના ૨૩૭ ટકાએ પહોંચ્યું છે. જપાનની સરકારી દેવાની સ્થિતિ ૧૯૯૦માં હતી એ સ્થિતિએ ચીન આવી ચૂક્યું હોવાથી ઇકૉનૉમિસ્ટો સરકારને વધુ આર્થિક બરબાદી માટે ચેતવી રહ્યા છે.

શૉર્ટ ટર્મ - લૉન્ગ ટર્મ

સોનામાં લૉન્ગ ટર્મ તેજી થવાની આગાહી અનેક ટેક્નિકલ ઍનલિસ્ટો અને માર્કેટ ગુરુઓ દ્વારા થઈ રહી છે. વર્લ્ડની ટૉપ-લેવલની રિસર્ચ કંપનીના ટેક્નિકલ ઍનલિસ્ટે સોના વિશે નવી આગાહી કરતાં જણાવ્યું હતું કે ૨૦૧૬ના અંત સુધીમાં સોનાનો ભાવ વધીને ૧૪૫૦  ડૉલર (૩૪,૧૯૦ રૂપિયા) થશે. હાલના ભાવથી ૨૦૦થી ૨૧૫ ડૉલરની તેજી થવાની આગાહી કરાઈ હતી. હાલ સોનાનો ભાવ વિદેશમાં ૧૨૩૪.૩૬ ડૉલર અને ઘરઆંગણે ૨૯,૧૦૦ રૂપિયા ચાલે છે. ટેક્નિકલ ઍનલિસ્ટની આગાહી અનુસાર સોનું ૧૨૮૦ ડૉલર (૩૦,૧૫૦ રૂપિયા) પાર કરી ગયા બાદ નવી બાઇંગ પૅટર્ન જોવા મળશે અને સોનામાં ઝડપી તેજીનો નવો તબક્કો શરૂ થશે.

સોનાની ઇમ્પોર્ટ ૨૦૧૫-’૧૬માં આઠ ટકા ઘટી

વર્લ્ડ લેવલે સોનાનો ભાવ ઘટતાં અને છેલ્લા બે મહિના દરમ્યાન જ્વેલરોની સ્ટ્રાઇકની અસરને કારણે ગયા નાણાકીય વર્ષ ૨૦૧૫-’૧૬માં સોનાની ઇમ્પોર્ટ આઠ ટકા ઘટીને ૩૧.૭૨ અબજ ડૉલરની થઈ હતી. આગલા નાણાકીય વર્ષમાં સોનાની ઇમ્પોર્ટ ૩૪.૩૮ અબજ ડૉલરની નોંધાઈ હતી. સોનાની ઇમ્પોર્ટનું મૂલ્ય ઘટતાં દેશની કરન્ટ અકાઉન્ડ ડેફિસિટ માર્ચમાં પાંચ વર્ષની નીચી સપાટીએ ૫.૦૭ અબજ ડૉલરની હતી જે ગયા વર્ષે માર્ચમાં ૧૧.૩૯ અબજ ડૉલરની રહી હતી.

ભાવ-તાલ
સોનું (૯૯.૯ ટચ, દસ ગ્રામ) : ૨૯,૨૬૫

સોનું (૯૯.૫ ટચ, દસ ગ્રામ) : ૨૯,૧૧૫

ચાંદી (.૯૯૯ ટચ કિલોદીઠ) : ૪૦,૨૫૦

(સોર્સ : ધ બૉમ્બે બુલિયન અસોસિએશન લિમિટેડ)

Economic Event Calendar

Economic Calendar >> Add to your site

Best Mutual Funds

Recent Posts

Search This Blog

Loading...

IPO's Calendar

Market Screener

Industry Research Reports

NSE BSE Tiker

Custom Pivot Calculator

Popular Posts

Market & MF Screener

Company Research Reports