કોર્પોરેટ ડેટમાં MFના રોકાણના નિયમો આકરા બનાવાશે

કેટલાંક ફિકસ્ડ ઇનકમ પોર્ટફોલિયોમાં અતિશય ક્રેડિટ રિસ્કની ચિંતાને પગલે સેબીએ કોર્પોરેટ ડેટ પેપર્સમાં મ્યુચ્યુઅલ ફંડ્સના રોકાણના નિયમોને આકરા બનાવાની યોજના બનાવી છે. મૂડીબજારની નિયમનકારી સંસ્થા સેબી વ્યક્તિગત કંપનીની ડેટ સિક્યોરિટીઝમાં મ્યુચ્યુઅલ ફંડ્સના રોકાણની મર્યાદામાં ઘટાડો કરવાની વિચારણા કરી રહી છે.

હાલના નિયમો મુજબ કોઇ એક મ્યુચ્યુઅલ ફંડ્સ સ્કીમ સિંગલ ઇશ્યૂકર્તાના ડેટ ઇન્સ્ટ્રુમેન્ટમાં નેટ એસેટ વેલ્યૂના ૧૫ ટકાથી વધુ રોકાણ કરી શકતી નથી. ક્રેડિટ રેટિંગ એજન્સીએ ઇન્વેસ્ટમેન્ટ ગ્રેડથી નીચું રેટિંગ આપ્યું છે તેવા ઇશ્યૂકર્તાના ડેટ પેપર્સને આવા નિયમ લાગુ પડે છે. જોકે આવી મર્યાદાને ટ્રસ્ટીની પૂર્વ મંજૂરી સાથે વધારીને ૨૦ ટકા કરી શકાય છે.

હવે સેબી માને છે કે આ મર્યાદા ઘણી ઊંચી છે, કારણ કે કેટલાંક મ્યુચ્યુઅલ ફંડ્સ નીચું રેટિંગ ધરાવતા ડેટ પેપર્સની મોટાપાયે ખરીદી કરે છે.

આ ગતિવિધિથી માહિતીગાર એક વ્યક્તિએ જણાવ્યું હતું કે "ડેટ પેપર્સનો સપ્લાય ઘણો ઓછો હતો, ત્યારે આ નિયમો ઘડવામાં આવ્યા હતા. પરંતુ હાલમાં ઘણા ડેટ પેપર્સ બજારમાં આવી રહ્યા છે. તેથી હાલની નીતિની સમીક્ષા કરવાનો સમય થઈ ગયો છે."

જેપી મોર્ગન એસેટ મેનેજમેન્ટની બે ડેટ સ્કીમ્સ આનું ઉદાહરણ છે. ઇન્ડિયા ટ્રેઝરી ફંડ અને ઇન્ડિયા શોર્ટ ટર્મ ઇનકમ ફંડ્સ સહિતની આ બે સ્કીમને તાજેતરમાં ઓટો એન્સિનિયરી કંપની એમટેક ઓટોના શેરના ભાવમાં તીવ્ર ઘટાડાને કારણે ફટકો પડ્યો છે. આ ઘટનાથી સેબીની પગલાં લેવાની ફરજ પડી છે. આ બંને સ્કીમ્સના આશરે 200 કરોડ અથવા એયુએમના આશરે છ ટકાનું ભંડોળ એમટેક ઓટોમાં રોકાણ કરવામાં આવ્યું હતું.

ટોચની ક્રેડિટ રેટિંગ એજન્સીએ એમટેક ઓટોના રેટિંગમાં ઘટાડો કર્યા બાદ જે પી મોર્ગનને ફંડ્સનું વેલ્યૂ 'માર્ક-ટુ માર્કેટ' કરવું પડ્યું હતું. હવે જેપી મોર્ગન ડિફોલ્ટની અણી પર છે, કારણ કે ડેટ પેપર્સની મુદત સપ્ટેમ્બરમાં પૂરી થાય છે.



સૂત્રોએ જણાવ્યું હતું કે ફંડ મેનેજર્સે માત્ર રેટિંગને આધારે રોકાણનો નિર્ણય કરવો જોઇએ નહીં, ફંડ મેનેજર્સ પોતાની રીતે પણ મૂલ્યાંકન કરવું જોઇએ. સેબી માને છે કે તાજેતરની ઘટનાને માત્ર એક ઘટના માનીને તેની અગવણના કરી શકાય નહીં. સેબીએ કેટલાંક ફંડ્સ હાઉસિસ પાસેથી ચોક્કસ ક્ષેત્રો અને ડેટ પેપર્સમાં તેમના રોકાણ અંગેની માહિતી માંગી છે.

નિયમો મુજબ ફંડ હાઉસિસ નોન બેન્કિંગ ફાઇનાન્સ કંપનીઓમાં 40 ટકાથી વધુ રોકાણ કરી શકે નહીં. સેબીએ જોખમી ગણાતા રિયલ એસ્ટેટ ક્ષેત્રના ડેટ પેપર્સમાં રોકાણ ન કરવા મ્યુચ્યુઅલ ફંડ્સની અનૌપચારિક સૂચના આપી છે. સેબી ગયા સપ્તાહે ચોક્કસ કંપની કે ક્ષેત્રમાં વધુ રોકાણ ન કરવા ફંડ મેનેજર્સને સૂચના આપી હતી.

રૂપિયો ઘટતાં NRIsએ ભારતમાં વધુ ડોલર ઠાલવ્યા

રૂપિયામાં સતત ઘટાડો ચાલુ છે ત્યારે બિનનિવાસી ભારતીયો (NRIs) ડોલર અને રૂપિયા વચ્ચેના ‌ફરકનો લાભ લેવા વધુ ને વધુ ડોલર ભારતમાં ઠાલવી રહ્યા છે, જેના પગલે છેલ્લા અઠવાડિયામાં જ રેમિટન્સની આવકમાં 70 ટકા સુધીનો ઉછાળો આવ્યો છે. ડોલર સામે રૂપિયો બુધવારે 63.61 પર બંધ રહ્યો હતો, જે મંગળવારના 63.53 પર 0.08 વધારે હતો.

આંતરરાષ્ટ્રીય પેમેન્ટ સર્વિસ પ્રોવાઇડર યુએઇ એક્સ્ચેન્જે જણાવ્યું હતું કે, ફક્ત છેલ્લા અઠવાડિયામાં જ એક્સ્ચેન્જ પર ઊંચી મૂલ્યના રેમિટન્સના વોલ્યુમમાં 70 ટકાનો ઉછાળો જોવા મળ્યો છે. યુએઇ એક્સ્ચેન્જના ટ્રેઝરી વિભાગના વાઇસ પ્રેસિડન્ટ અશ્વિન શેટ્ટીએ કહ્યું હતું કે, "આ પ્રકારના નાણાકીય વ્યવહારોમાં 20 ટકા સુધીનો વધારો જોવા મળ્યો છે, છતાં અમને વોલ્યુમની દૃષ્ટિએ ઊંચા મૂલ્યના રેમિટન્સમાં 70 ટકા સુધીનો વધારો જોવા મળ્યો છે." તેમણે ઉમેર્યું હતું કે, બિનનિવાસી ભારતીયો રૂ.25 લાખથી રૂ.5 કરોડ વચ્ચે રેમિટિંગ કરાવી રહ્યા છે.

ગયા વર્ષે દેશમાં રેમિટન્સની આવકની દૃષ્ટિએ 70 અબજ ડોલરની જંગી રકમ આવી હતી અને ભારતે રેમિટન્સની આવકમાં વિશ્વમાં ટોચનું સ્થાન મેળવ્યું હતું. ભારત પછી 60 અબજ ડોલરની રેમિટન્સ આવક મેળવીને બીજું સ્થાન મેળવ્યું હતું અને 25 અબજ ડોલર સાથે ફિલિપાઇન્સ ત્રીજા સ્થાને હતો. વર્ષ 2012માં ભારતે રેમિટન્સ સ્વરૂપે 69 અબજ ડોલરની આવક કરી હતી અને વિશ્વ બેન્કના જણાવ્યા મુજબ, ચાલુ વર્ષે રેમિટન્સની આવક સર્વોચ્ચ સપાટીને આંબી જશે.

એક્સપ્રેસ મનીના વાઇસ પ્રેસિડન્ટ અને બિઝનેસ હેડ સુદેશ ગિરિયાને કહ્યું હતું કે, રૂપિયામાં ઘટાડાની રેમિટન્સની આવક પર હકારાત્મક અસર થઈ છે અને ઊંચી નેટવર્થ ધરાવતી વ્યક્તિઓ (HNIs) વધુ ને વધુ ડોલર દેશમાં ઠાલવી રહ્યા છે.

અમે ઊંચા મૂલ્ય ધરાવતા રેમિટન્સના વોલ્યુમમાં 15થી 20 ટકાનો ઉછાળો જોયો છે." તેમણે જણાવ્યું હતું કે, ઊંચી નેટવર્થ ધરાવતી વ્યક્તિઓ પાસે ઊંચી ખર્ચપાત્ર આવક છે અને રૂપિયો ઘટે છે ત્યારે તેનો ફાયદો ઉઠાવવાની તકની રાહ જોતા હોય છે. તેમણે કહ્યું હતું કે, "તેઓ ભંડોળનો સંચય કરે છે અથવા સસ્તા દરે સંબંધિત દેશોની બેન્કો પાસેથી ઋણ લે છે અને પછી તેને ભારતમાં મોકલે છે."

દરમિયાન રૂપિયો બુધવારે સતત ત્રીજા દિવસે ઘટ્યો હતો અને ડોલર સામે 63.61 પર બંધ રહ્યો હતો. ઇન્ટબેન્ક ફોરેન એક્સ્ચેન્જ (ફોરેક્સ) બજારમાં રૂપિયો રૂ.63.80ની નીચી સપાટીએ ખૂલ્યો હતો. પછી ધીમે ધીમે 63.89ની સપાટીએ પહોંચી ગયો હતો. પણ નિકાસકારો દ્વારા ડોલર અને ઇક્વિટીના વેચાણને પગલે થોડો સુધારો થયો હતો અને 63.61 પર બંધ રહ્યો હતો.

ટોપ-10 કંપનીઓના માર્કેટકેપમાં રૂ.84,209 કરોડનું ધોવાણ

નવી દિલ્હી:મંદીના બજારમાં ગત સપ્તાહે માર્કેટકેપની દ્રષ્ટિએ સેન્સેક્સની ટોપ-10 કંપનીઓના સંયુક્ત માર્કેટકેપમાં રૂ.84,209 કરોડનું જંગી ધોવાણ જોવાયું હતું. સૂચિતગાળામાં ONGC અને RILના શેરધારકોના બજાર મૂલ્યમાં સૌથી વધુ ઘટાડો જોવાયો હતો.

સાપ્તાહિક ધોરણે સેન્સેક્સ 1,190.48 પોઈન્ટ અથવા તો 4.51 ટકા ઘટીને 25,201.90 પોઈન્ટની સપાટીએ બંધ રહ્યો હતો. આમ સતત ચોથા સપ્તાહે BSE બેન્ચમાર્કમાં ઘટાડો જોવાયો છે.

ONGCનું માર્કેટકેપ રૂ.15,357.1 કરોડ ગગડીને રૂ.1,93,011.86 કરોડ નોંધાયું હતું જ્યારે RILનું માર્કેટકેપ 11,527.8 કરોડ રૂપિયાના ઘટાડા સાથે રૂ.2,70,579.56 કરોડ નોંધાયું હતું.

HDFCનું માર્કેટકેપ પણ 9,229.71 રૂપિયા ઘટીને રૂ.1,80,038.45 કરોડ, ITCનું માર્કેટકેપ રૂ.8,905.99 કરોડ ઘટીને 2,53,901.04 કરોડ જ્યારે ઈન્ફોસિસનું માર્કેટકેપ 8,475.72 કરોડ ઘટીને રૂ.2,46,645.92 કરોડ નોંધાયું હતું.

સમીક્ષા હેઠળના ગાળામાં HDFC બેન્કનું માર્કેટકેપ રૂ.7,739.77 કરોડના ધોવાણ સાથે રૂ.2,50,623.13 કરોડ અને કોલ ઈન્ડિયાનું માર્કેટકેપ રૂ.6,726.92 કરોડ ઘટીને રૂ.2,19,019.94 કરોડ નોંધાયું હતું.

સન ફાર્માનું માર્કેટકેપ પણ રૂ.6,352.99 કરોડના ઘટાડા સાથે રૂ.2,06,604.59 કરોડ નોંધાયું હતું જ્યારે HULનું માર્કેટકેપ રૂ. 5,741.39 કરોડના ધોવાણ સાથે રૂ.1,79,675.61 કરોડ નોંધાયું હતું.

આ ઉપરાંત TCSનું માર્કેટકેપ પણ રૂ.4,152.51 કરોડના ઘટાડા સાથે રૂ.4,99,367.90 કરોડ થયું હતું.

આ સાથે સેન્સેક્સની ટોપ-10 કંપનીઓની યાદીમાં TCSએ તેનું ટોચનું સ્થાન જાળવી રાખ્યું હતું. ત્યારબાદ અનુક્રમે RIL, ITC, HDFC બેન્ક, ઈન્ફોસિસ, કોલ ઈન્ડિયા લિમિટેડ, સન ફાર્મા, ONGC, HDFC અને HULનો ક્રમ આવે છે.

FII હજુ મંદીમાં: નિફ્ટી 7,200 થશે?

નિફ્ટી આગામી બે-ત્રણ મહિનામાં 7,100ની સપાટીએ પહોંચશે? કેટલાક રોકાણકારો 7,100 અને 7,200ની સ્ટ્રાઇક પ્રાઇસમાં વૃદ્ધિને કારણે બજારમાં ઘટાડો ચાલુ રહેવાની શક્યતા દર્શાવી રહ્યા છે. ખાસ કરીને વિદેશી પોર્ટફોલિયો ઇન્વેસ્ટર્સ (FPIs)એ નિફ્ટીમાં મોટા પાયે મંદીની પોઝિશન ગોઠવી છે.

ડેરિવેટિવ્ઝ વિશ્લેષકોના જણાવ્યા અનુસાર નિફ્ટી નીચામાં 7,200ની સપાટીને સ્પર્શી શકે. જ્યારે ટૂંકા ગાળામાં તે 8,200 સુધી જવાની શક્યતા છે. આ બંને ધારણાના આધારે FII પોઝિશન ગોઠવી રહ્યા છે. બજારમાં સુધારો નહીં થાય એ ધારણાએ FIIએ નિફ્ટીના કોલ ઓપ્શન્સ વેચ્યા છે. જ્યારે નિફ્ટી કોલ ઓપ્શન્સના વેચાણથી મળેલા નાણાંનો આંશિક કે સંપૂર્ણ ઉપયોગ FII નિફ્ટી પુટ ઓપ્શન્સની ખરીદી માટે કરી રહ્યા છે. એટલે બજારમાં વધુ ઘટાડો નોંધાય તો પુટ ઓપ્શન્સની પોઝિશનથી લાભ થશે.

સપ્ટેમ્બરની F&O સિરીઝ શરૂ થઈ ત્યારથી (27 ઓગસ્ટથી) બંને તરફી ટ્રેડ થઈ રહ્યા છે. FIIએ નિફ્ટીના આઉટ ઓફ ધ મની પુટ ઓપ્શન્સનું મોટા પાયે ફન્ડિંગ કર્યું છે. જેમાં FIIએ 7,800-7,200ના નિફ્ટી પુટ ઓપ્શન્સ ખરીદી 8,000-8,200ના કોલ ઓપ્શન્સ વેચ્યા છે. જેની સ્ટ્રાઇક પ્રાઇસ વર્તમાન બજાર ભાવ કરતાં વધુ છે.

બજાર ઘટશે તો આ FPIsને પુટની પોઝિશનમાં લાભ થશે. કારણ કે વોલેટિલિટી વધવાથી પુટ્સના ભાવમાં વધારો નોંધાશે. તેની સાથે તેમણે વેચેલા કોલ આઉટ ઓફ ધ મનીમાં પરિણમશે અને એટલે તેમણે કોલ ખરીદદારો પાસેથી મેળવેલું પ્રીમિયમ ગુમાવવું નહીં પડે. જોકે, 8,000-8,200 સુધીના પ્રત્યાઘાતી ઉછાળાની ટૂંકા ગાળામાં શક્યતા ઓછી છે, પરંતુ બિલકુલ અશક્ય નથી.

જો આવું થાય તો તેમને મોટું નુકસાન વેઠવું પડશે. ઉપરાંત, વોલેટિલિટી ઘટવાને લીધે તેમણે ખરીદેલા પુટ્સનું મૂલ્ય પણ ઘટશે. આવા ટ્રેડ જોખમી હોય છે, કારણ કે તેમાં બંને તરફી નુકસાનની શક્યતા રહેલી છે. ઇન્ડિયા ઇન્ફોલાઇનના હેમંત નાહટા જણાવ્યા અનુસાર "FII આ પ્રકારની પોઝિશન ગોઠવી રહ્યા છે.

એનો અર્થ એ થયો કે તેમને બજારમાં વધુ ઘટાડાનો અંદાજ હશે. તેઓ કેશ માર્કેટમાં વધુ વેચવાલીની આશા રાખી રહ્યા છે." કોટક મ્યુચ્યુઅલ ફંડના એમડી નિલેશ શાહે જણાવ્યું હતું કે, "ચીનની અનિશ્ચિતતા અને ક્રૂડમાં ઘટાડો ચાલુ રહેશે ત્યાં સુધી ઇટીએફ અને સોવરિન ફંડના મોટા વિદેશી રોકાણકારોની વેચવાલી ચાલુ રહેશે. તેને લીધે ઊર્જા સ્રોતથી સમૃદ્ધ દેશોના રિડેમ્પશ દબાણમાં વધારો નોંધાશે."

બજારમાં ગયા સપ્તાહે 3.7 ટકાનો ઘટાડો નોંધાયો ત્યારે સૌથી એક્ટિવ 7,500ના પુટનો ભાવ ગયા સપ્તાહે 159 ટકા ઊછળી રૂ.129.૫ના સ્તરે પહોંચ્યો છે. ભાવમાં વૃદ્ધિ સાથે ઓપન ઇન્ટરેસ્ટ 18 લાખ લોટથી વધીને 45 લાખ લોટ થયો છે. NSEના કામચલાઉ ડેટા પ્રમાણે સૌથી એક્ટિવ 8,200નો કોલ શુક્રવારે 79 ટકા ગબડી રૂ.18.75ના સ્તરે પહોંચ્યો છે.

ચાર્ટિસ્ટ્સના મતે આગામી ત્રણ મહિનામાં નિફ્ટી 7,100-7,300 થવાનો અંદાજ છે. ઉપરાંત, દરેક ઘટાડે નીચી સ્ટ્રાઇક પ્રાઇસના નિફ્ટી પુટ ઓપ્શન્સનો ઓપન ઇન્ટરેસ્ટ વધી રહ્યો છે. નિર્મલ બંગ ઇન્સ્ટિટ્યુશનલ ઇક્વિટીના એસોસિએટ વાઇસ પ્રેસિડન્ટ સાગર બજાજે જણાવ્યું હતું કે, "નિફ્ટી માટે 7,500-7,600ની રેન્જ ટૂંકા ગાળાના સપોર્ટનું કામ કરશે. જ્યારે કોઇ પણ સુધારો 8,000 ની સપાટી પૂરતો મર્યાદિત રહેશે. આગામી બે-ત્રણ મહિનામાં નિફ્ટી 7,150-7,200ની રેન્જમાં પહોંચશે. જોકે, સમયાંતરે થોડા ઉછાળા જોવા મળી શકે."

નિફ્ટીમાં 7,200-7,550ની રેન્જમાં મનોવૈજ્ઞાનિક ટેકો છે. ઘણા લાંબા ગાળાના રોકાણકારોએ ગયા વર્ષે નરેન્દ્ર મોદીની સરકારે સત્તા સંભાળી ત્યારે આ જ સ્તરે ભારતીય બજારમાં નાણાં ફાળવવાનું શરૂ કર્યું હતું.

હાઇ ફ્રીકવન્સી ટ્રેડિંગ પર SEBIનું સ્પીડ-બ્રેકર લાગુ પડશે

અત્યંત ઝડપી ગતિએ ટ્રાન્ઝેક્શન્સ કરવાની ક્ષમતાને કારણે કેટલાંક ટ્રેડરો જેનો ગેરલાભ ઉઠાવતા હોવાનો આક્ષેપ કરવામાં આવે છે તે હાઇ-ફ્રીકવન્સી ટ્રેડિંગ (HFT) પર સ્પીડ-બ્રેકર મૂકનારા દેશોમાં ભારત પ્રથમ હોઇ શકે છે. બ્લેક-બોક્સ ટ્રેડિંગ ધીમું પાડી શકે તેવા આ સંભવિત પગલાં અંગે સેબી એક્સચેન્જીસ અને પસંદગીની સંસ્થાઓ પાસેથી ફીડબેક લઇ રહી છે.

બજારના એક વર્ગમાં એવી લાગણી પ્રબળ બની રહી છે કે આ વર્ષના અંત પહેલાં HFT પર પ્રતિબંધ આવી શકે છે. અનેક વિદેશી સંસ્થાઓ અને લાર્જ પ્રોપ્રાઇટરી ડેસ્ક્સ આધુનિક સોફ્ટવેર પ્રોગ્રામ્સનો ઉપયોગ કરે છે અને નાના બ્રોકર્સ તથા ટ્રેડર્સની સરખામણીમાં લાભ ઉઠાવે છે.

ટ્રેડિંગ વોલ્યુમ્સમાં HFTનો મોટો હિસ્સો છે અને તેમને મર્યાદિત કરવું એ અભૂતપુર્વ પગલું ગણાશે તેમ છતાં સેબી HFT અને નોન HFT યુઝર્સ વચ્ચે સમાન તકો પૂરી પાડવા આંતરિક પગલાં ભરવા વિચારી રહી છે એમ આ યોજનાથી માહિતગાર લોકોએ જણાવ્યું હતું.

સેબીએ ઓર્ડર્સના રેન્ડમાઇઝેશન અંગે પણ સૂચનો મગાવ્યા છે, જેનો અર્થ એ થયો કે HFT યુઝર્સને મળતી પ્રાથમિકતા રદ કરવી. રેન્ડમાઇઝેશનમાં ઓર્ડર્સને એક્સચેન્જ સિસ્ટમમાં ભેગી કરવામાં આવે છે અને રેન્ડમ ધોરણે ચલાવવામાં આવે છે. આનાથી એચએફટી યુઝર્સને ગેરલાભ થશે કારણ કે સિસ્ટમમાં પહેલો હીટ થનારો ઓર્ડર લાઇનમાં પહેલો હોય તે જરૂરી નથી.

ઝેરોધાના ચીફ એક્ઝિક્યુટિવ નિધીન કામથે જણાવ્યું હતું કે, રેન્ડમાઇઝેશન લાવવાથી HFT બિઝનેસ લગભગ ખતમ થઇ જશે કારણ તેમને કોઇ 'એડવાન્ટેજ' રહેશે નહીં. છેલ્લાં કેટલાંક વર્ષોથી અનેક એફપીઆઇ એચએફટી મોડલનો ઉપયોગ કરીને મેમ્બર કે ક્લાયન્ટ તરીકે ભારતીય બજારોમાં ટ્રેડિંગ કરી રહ્યા છે. અલ્ગો ટ્રેડર્સ તરીકે વધુ જાણીતા આ રોકાણકારો સુપર-ફાસ્ટ ઝડપે શ્રેષ્ઠ કિંમત મેળવવા ચડિયાતા સોફ્ટવેર મોડલ્સનો ઉપયોગ કરે છે.

ઓર્ડર ક્યુમાં પ્રથમ રહેવાની રેસને દૂર કરવા સેબી ટ્રેડના બેચ ઓક્શન્સનો ઉપયોગ કરવા પણ વિચારે છે. નિયમનકાર એક્સચેન્જીસ પર HFT યુઝર્સને ટિક-બાય-ટિક ડેટા પૂરો પાડવા પર પ્રતિબંધ મૂકવા પણ વિચારે છે.

ટિક ડેટામાં ટ્રેડિંગ ડેમાં થયેલા તમામ બાય અને સેલ ટ્રેડ્સનો સમાવેશ થાય છે. ટ્રેડિંગ પ્લેટફોર્મ સાથે કનેક્ટ થવા સામાન્ય ઇન્ટરનેટનો ઉપયોગ કરતા સામાન્ય ટ્રેડર્સને બહુ બહુ તો ચાર ટિક્સનું એક્સેસ છે, જ્યારે HFTને આંખના એક પલકારામાં 300 જેટલાં ટિક્સનું એક્સેસ છે.

આ ઝડપે ટ્રેન્ડ્સને પકડવું માનવ આંખ માટે અશક્ય છે, તેમ છતાં હાઇ ફ્રીકવન્સી ટ્રેડર્સ તેમના કમ્પ્યુટર્સ પર એવા એડવાન્સ પ્રોગ્રામ્સ બનાવે છે, જે આ ટ્રેન્ડ વાંચી શકે અને આ ટિક્સને આધારે ટ્રેડ એક્ઝીક્યુટી કરી શકે.

એમ્ટેક ઓટોમાં રોકાણકારોના રૂ.800cr ફસાયા

મુંબઈ:ચારેકોરથી મુશ્કેલીમાં મૂકાયેલી એમ્ટેક ઓટો તેનું પેમેન્ટ ચૂકવવામાં નિષ્ફળ જવાની શક્યતાને પગલે એક્સિસ બેન્ક, કરૂર વૈશ્ય, સિન્ડિકેટ બેન્ક, કોર્પોરેશન બેન્ક અને કેટલાક પેન્શન ફંડ્સ સહિતનાં 80થી વધુ રોકાણકારોએ જુલાઈ-સપ્ટેમ્બર ક્વાર્ટરમાં તેમના ચોપડામાં ઓછામાં ઓછા રૂ.800 કરોડની ખોટ તોળાઈ રહી છે એમ આ હિલચાલથી પરિચિત ચાર વ્યક્તિએ કહ્યું હતું.

એમ્ટેક ઓટોએ તારીખમાં ફેરફાર કરવાની વિનંતી કરી છે, જેને રોકાણકારો સ્વીકારે તેવી શક્યતા નથી કારણ કે, હાઈ નેટવર્થ ઈન્ડિવિડ્યુઅલ્સ (HNIs) અને પેન્શન ફંડ્સ પાસે કંપનીના આ મહિને પાકી રહેલાં બોન્ડ્સનો નોંધપાત્ર હિસ્સો હોવાથી તારીખ બદલવી શક્ય નથી એમ ઉપરોક્ત માહિતી આપનાર લોકોએ કહ્યું હતું.

એક બેન્કરે ઓ‌ળખ છતી ન કરવાની શરતે કહ્યું હતું કે, "તેઓ પુનર્ગઠનની માંગણી કરી રહ્યાં છે પરંતુ 80થી વધુ રોકાણકારો હોવાથી તેમ કરવું શક્ય નહીં બને. બોન્ડમાં રોકાણ કરનારી બેન્કોની સંખ્યા જ 10 છે, આથી તેઓ શું કરવું તેનો નિર્ણય કરી શકતા નથી."

ગુડગાંવ સ્થિત એમ્ટેક ઓટો મારુતિ સુઝુકી જેવી કંપનીઓને ઓટો કમ્પોનન્ટ્સનો સપ્લાય કરે છે અને ઓક્ટોબરમાં તેના 10 વર્ષીય બોન્ડ્સની મુદત પાકી રહી છે અને કંપની આ બોન્ડની ચૂકવણી કરવામાં નિષ્ફળ જવાની શક્યતા રોકાણકારોને વરતાઈ રહી છે એમ પરિચિત લોકોએ જણાવ્યું હતું.

એક્સિસ બેન્કે જણાવ્યું હતું કે, "અમે વ્યક્તિગત ગ્રાહકના ટ્રાન્ઝેક્શન કે રોકાણ અંગે ટિપ્પણી કરતા નથી." વારંવારના પ્રયાસ કરવા છતાં એમ્ટેક ઓટોના અધિકારીઓનો સંપર્ક થઈ શક્યો નહોતો. એક્સિસ બેન્કે એમ્ટેક પાસેથી કુલ કેટલા લેવાના નીકળે છે તે અંગે હજુ અસ્પષ્ટતા છે.

એમ્ટેક ઓટો સખત નાણાંભીડમાં છે, જેથી મ્યુચ્યુઅલ ફંડ જેપી મોર્ગન એસેટ મેનેજમેન્ટને પણ ભારતમાં ફટકો પડ્યો છે. આ મ્યુ. ફંડે મૂલ્ય માંડવાળ કર્યા બાદ તેના બે ફિક્સ્ડ ઈન્કમ ફંડ્સમાંથી વિધ્ડ્રોવલ્સ પર અંકુશ મૂકી દીધો હતો. લગભગ રૂ.16,000 કરોડની લોન અને બોન્ડ્સનું ભાવિ જોખમમાં છે. આને તાત્કાલિક બેડ લોન્સમાં તબદીલ કરવાની જરૂર નથી કારણ કે, એમ્ટેક ઓટો વ્યાજ ચૂકવવાનું ચાલુ રાખશે અને કંપની તેના ફાયનાન્સ તરીકે જેમના તેમ રાખશે.

એમ્ટેક ઓટોએ મે મહિનામાં જર્મનીની રેજ હોલ્ડિંગ GmbHને ખરીદવા સહમતિ સાદી હતી. આ સોદો તેનો ૧૯મો સોદો હતો. એમ્ટેક ગ્રૂપ વિવિધ દેશોમાં કુલ 63 ઉત્પાદન સુવિધાઓનું સંચાલન કરે છે અને ખાસ તો ઓટોમોબાઈલ ઉદ્યોગ માટે કાસ્ટિંગ અને ફોર્જિંગ બિઝનેસ પર ધ્યાન કેન્દ્રિત કરે છે.

સપ્ટેમ્બર ૨૦૧૪માં રેટિંગ કંપની CARE લિ.એ એમ્ટેક ઓટોનું ક્રેડિટ રેટિંગ AA+થી ઘટાડીને AA કરવામાં આવ્યા બાદ ધીમે ધીમે કંપનીની હાલત કફોડી બનવાનું શરૂ થયું હતું. આ રેટિંગ ઓગષ્ટમાં A+થી વધુ ઘટાડીને C કરવામાં આવ્યું હતું.

અન્ય એક બેન્કરે કહ્યું હતું કે, "એમ્ટેક ઓટો મુશ્કેલીમાં છે, જેની અમને ખબર છે. કંપનીને તેમાંથી બહાર કાઢવા માટે કેવા પ્રયાસ કરવા તે અંગે અમે તેમની સાથે વાતચીત કરી રહ્યાં છીએ."

2014ના એપ્રિલ-જૂન ક્વાર્ટરમાં રૂ.86.1 કરોડનો નફો કરનારી એમ્ટેકે જૂન-'15 ક્વાર્ટરમાં રૂ.157.6 કરોડની ખોટ નોંધાવી હતી. કંપનીની કુલ આવક પણ રૂ.1,064.4 કરોડથી ઘટીને રૂ.866.3 કરોડ થઈ હતી.

કંપનીના માથે અંદાજે રૂ.17,661 કરોડનું ઋણ છે. એમ્ટેક ઓટોનો શેર એક વર્ષમાં તેની ટોચેથી 88 ટકા પટકાયો છે અને કંપનીએ તેની કથળતી નાણાકીય પરિસ્થતિ અંગે ચેતવણી ઉચ્ચારી છે.

બજારો ઓવરસોલ્ડ ઝોનમાં, સપોર્ટનો અભાવ

ગયા સપ્તાહે ભારતના શેરબજારમાં મંદીની પકડમાં આવ્યા હતા અને નોંધપાત્ર પ્રમાણમાં વેચવાલી જોવા મળી હતી. બજારમાં ગુરુવારે રિકવરી જોવા મળી હતી, પરંતુ શુક્રવારે વેચવાલીનું ભારે દબાણ ફરી હાવી થયું હતું.

વિશ્વના મોટાભાગના બજાર તેમના 200 દિવસની મુવિંગ એવરેજ (ડીએમએ)થી નીચે ટ્રેડ થઈ રહ્યા છે અને મોટાભાગના બજારોએ બાવન સપ્તાહની નવી નીચી સપાટી બનાવી છે.

તેનાથી ભારત સહિતના ઊભરતા બજારોમાં દબાણ જોવા મળે તેવી ધારણા છે. હવે વિશ્વભરના બજારો અમેરિકાના જોબ ડેટા પર ચાંપતી નજર રાખી રહ્યા છે. આ ડેટાથી અમેરિકામાં ફેડરલ રિઝર્વ દ્વારા વ્યાજદર અંગેના નિર્ણયનું ભાવિ નિર્ધારિત થશે.

ભારતના જીડીપીના ડેટા ગયા સપ્તાહે આવ્યા હતા. જીડીપી ચાલુ નાણાકીય વર્ષના વૃદ્ધિદર જાન્યુઆરી માર્ચ ક્વાર્ટરમાં 7 ટકા રહ્યો હતો, જે અગાઉના વર્ષના સમાન ગાળાનામાં 7.5 ટકા હતો. જીડીપીના મહત્ત્વના ક્ષેત્રોમાં કૃષિ, મેન્યુફેક્ચરિંગ, કન્સ્ટ્રક્શન અને માઇનિંગ ક્ષેત્રનો વૃદ્ધિદર અનુક્રમે 1.9 ટકા, 7.2 ટકા, 6.9 ટકા અને 4 ટકા રહ્યો હતો, જે અગાઉના વર્ષના સમાન ગાળામાં અનુક્રમે 2.6 ટકા, 8.4 ટકા, 6.5 ટકા અને 4.3 ટકા રહ્યો હતો. વીજળી ક્ષેત્રનો વૃદ્ધિદર 3.2 ટકા રહ્યો હતો.

ભારતના બજારો ઓવરસોલ્ડ ઝોનમાં પ્રવેશ્યા છે અને તેજીવાળાનો કોઇ સપોર્ટ નથી. તેથી બજારમાં દબાણ છે. સોમવાર અથવા મંગળવારે નજીવી રિકવરીની ધારણા રાખી શકાય છે. નિફ્ટીમાં 7,500 અને 7,450એ સપોર્ટ છે. નિફ્ટીમાં અવરોધ હવે 7,892 અને 7,950એ મળી શકે છે.

આગામી સપ્તાહ માટેની રોકાણકારોની વ્યૂહરચના નિફ્ટીમાં 7500ના પુટ ઓપ્શન અને તેની સાથે 7800ના કોલ ઓપ્શનની ખરીદી અંગેની બની શકે છે. નિફ્ટીમાં 7500ના પુટ ઓપ્શન અને 7300ના પુટ ઓપ્શનની શોર્ટ પોઝિશનની વ્યૂહરચના પણ યોગ્ય પુરવાર થઈ શકે છે.

સોના માટેનું આઉટલૂક નબળું છે અને તેનો સપોર્ટ ઔંશ દીઠ 1108 ડોલરે છે. સોના માટેનો અવરોધ 1130 અને 1138 ડોલરે છે. ક્રૂડ ઓઇલમાં (નાઇમેક્સ ક્રૂડ) બેરલ દીઠ ૪૫ ડોલરથી ઊંચો ભાવ થોડો પોઝિટિવ છે. જોકે ક્રૂડ તેના કરતા નીચા સ્તરે જશે તો વધુ નરમાઈ આવી શકે છે.

ક્ષેત્રિય મોરચે જોવા જઇ તો બેન્કિંગ, મેટલ, કેપિટલ ગૂડ્સ, સિમેન્ટ, મેન્યુફેક્ચરિંગ કંપનીઓ અત્યંત નકારાત્મક છે. બીજી તરફ આઇટી અને ફાર્મા કંપનીઓ નીચા સ્તરે બજારને સપોર્ટ આપે તેવી શક્યતા છે.

અમેરિકાના બજાર માટેની અગત્યની ઘટનાઓમાં જોબલેસ ક્લે, કોર પીપીઆઇ અને કન્ઝ્યુમર સેન્ટિમેન્ટ ડેટા મહત્ત્વના છે. યુરોઝોનના બજારોની નજર આ સપ્તાહે રિટેલ પીએમઆઇના ડેટા પર રહેશે.

જાપાનના બજારો આ સપ્તાહે કરન્ટ એકાઉન્ટ, જીડીપી ડેટા અને મનીનરી ઓર્ડર્સ પર ચાંપતી નજર રાખશે. ચીનના મોરચે જોઇએ તો બેલેન્સ ઓફ ટ્રેડ, પીપીઆઇ, ફુગાવો, રિટેલ સેલ્સ અને ઔદ્યોગિક ઉત્પાદનના ડેટા બજાર માટે મહત્ત્વના છે.

આ સપ્તાહે ભારતના બજાર માટે કરન્ટ એકાઉન્ટ ડેટા, ઔદ્યોગિક અને મેન્યુફેક્ચરિંગ ડેટા મહત્ત્વના ચાલકબળ બનવાની ધારણા છે.