એપ્રિલમાં ફુગાવો 4.89%ની 41 મહિનાની નીચી સપાટીએ

ફુગાવાનો દર ઘટીને 4.89 ટકાની 41 મહિનાની નીચી સપાટીએ પહોંચી ગયો હતો . માર્ચમાં ફુગાવો 5.96 ટકા નોંધાયો હતો . ET નાઉના 5.3 ટકાના અંદાજની સરખામણીમાં પણ એપ્રિલનો ફુગાવાનો દર નીચો રહ્યો હતો .

નવેમ્બર , 2009 બાદ પ્રથમવાર જથ્થાબંધ આધારિત ફુગાવો આટલી નીચી સપાટીએ પહોંચ્યો છે . ફેબ્રુઆરીનો ફુગાવાનો આંક અગાઉના 6.84 ટકાથી સુધારીને 7.28 ટકા કરવામાં આવ્યો છે .

માર્ચના 8.73 ટકાની સરખામણીમાં એપ્રિલમાં ખાદ્ય ફુગાવો ઘટીને 6.08 ટકા નોંધાયો હતો જ્યારે પ્રાથમિક ચીજવસ્તુઓનો ફુગાવો 7.6 ટકાની સરખામણીમાં ઘટીને 5.75 ટકા થયો હતો .

શાકભાજી , ખાદ્ય તેલ અને પ્રોટિન આધારિત ચીજવસ્તુઓના ભાવમાં ઘટાડાને કારણે એપ્રિલમાં રિટેલ ફુગાવો સતત બીજા મહિને ઘટીને 9.39 ટકા થયો હતો .

અત્રે ઉલ્લેખનીય છે કે માર્ચમાં કન્ઝ્યુમર પ્રાઈસ ઈન્ડેક્સ આધારિત ફુગાવો 10.39 ટકા નોંધાયો હતો .

છેલ્લા કેટલાંક મહિનાઓથી ફુગાવામાં ઘટાડા છતાં ભારતીય રિઝર્વ બેન્ક દેશની ચાલુ ખાતાની ખાધને લઈને ચિંતિત છે . દેશની આર્થિક સ્થિતિ દાયકાની નીચી સપાટીએ આવી ગઈ હોવાથી રિઝર્વ બેન્કના ગવર્નર ડી સુબ્બારાવ સાવચેત વલણ અપનાવી રહ્યા છે .

ચાલુ વર્ષે આરબીઆઈએ ત્રીજા વાર રેપો રેટમાં ઘટાડો કર્યા બાદ હવે વ્યાજદરમાં વધુ ઘટાડાની કોઈ તક નહી હોવાનો સંકેત આપ્યો હતો .