ઘણી કંપનીઓની ડિવિડન્ડ યીલ્ડ આકર્ષક

ચીનની નરમાઇ અને વિદેશી સંસ્થાકીય રોકાણકારોની એકધારી વેચવાલીથી ભારતના શેરબજારમાં તીવ્ર ઘટાડાને પગલે સારુ સંચાલન ધરાવતી અને ડિવિડન્ડની ચુકવણી કરતી કંપનીઓના શેરો ડિવિડન્ડના સંદર્ભમાં આકર્ષક બન્યા છે. આ કંપનીઓની ડિવિડન્ડ યીલ્ડ હવે તુલનાત્મક રીતે રોકાણકારો માટે લાભકારક બની છે.

શેરબજારના મુખ્ય સૂચકાંકોમાં એક મહિનામાં આશરે 10 ટકા અને છ મહિનામાં આશરે 14 ટકાનો ઘટાડો થયો છે. શેરબજારમાં આવી એકધારી નરમાઈથી રોકાણકારો માટે ગ્રોથ શેરોને ઓળખવાનું મુશ્કેલ બન્યું છે. તેથી તેઓ સારો કોર્પોરેટ ગવર્નન્સ , સ્થિર બિઝનેસ મોડલ અને ડિવિડન્ડનો સારો રેકોર્ડ ધરાવતી કંપનીઓના શેરોની પસંદગી કરી શકે છે. શેરબજારમાં સતત ઘટાડાને કારણે આવી કંપનીઓની ડિવિડન્ડ યીલ્ડમાં નોંધપાત્ર સુધારો થયો છે.

આ ઉપરાંત ડિવિડન્ડ રોકાણકારોના હાથમાં ટેક્સમુક્ત હોય છે. તેનાથી શેરબજારમાં અનિશ્ચિતતાના તોફાન વચ્ચે આ શેરો વધુ આકર્ષક બને છે. ઇટી ઇન્ટેલિન્સ ગ્રૂપ આવી કંપનીઓની યાદી બનાવી છે. શુક્રવારના બજારના ઘટાડા બાદ આ કંપનીઓની ડિવિડન્ડ યીલ્ડ હવે આકર્ષક બની છે.

સારી ડિવિડન્ડ યીલ્ડ ધરાવતી કંપનીઓમાં એનએમડીસી, કોલ ઇન્ડિયા, નેશનલ એલ્યુમિનિયમ કંપની, જે બી કેમિકલ્સ એન્ડ ફાર્મા, સોનાટા સોફ્ટવેર, ઇન્ડિયાબુલ્સ હાઉસિંગ ફાઇનાન્સ, યુકો બેન્ક, વીએસટી ઇન્ડસ્ટ્રીઝ, ઓઇલ ઇન્ડિયા, આઇએલ એન્ડ એફએસ, ટાન્સપોર્ટેશન, રૂરલ ઇલેક્ટ્રિફિકેશન, પાવર ફાઇનાન્સ કોર્પ સહિતની કંપનીઓનો સમાવેશ થાય છે.

માઇનિંગ એન્ડ મિનરલ ક્ષેત્રની કંપની એનએમડીસી હાલમાં 8.7 ટકા અને કોલ ઇન્ડિયા 6.0 ટકા ડિવિડન્ડ યીલ્ડ ધરાવે છે. મેટલ ક્ષેત્રની કંપની નેશનલ એલ્યુમિનિયમ કંપનીની ડિવિડન્ડ યીલ્ડ 5.4 ટકા છે, જ્યારે ફાર્મા ક્ષેત્રની કંપની જે બી કેમિકલ્સની ડિવિડન્ડ યીલ્ડ હાલમાં 5.1 ટકા છે.

આ ઉપરાંત સોના સોફ્ટવેર 5.1 ટકા, ઇન્ડિયા બુલ્સ હાઉસિંગ ફાઇનાન્સ 4.9 ટકા, યુકો બેન્ક 4.8 ટકા, વીએસટી ઇન્ડસ્ટ્રીઝ 4.8 ટકા, ઓઇલ ઇન્ડિયા 4.7 ટકા, આઇએલ એન્ડ એફએસ ટ્રાન્સપોર્ટેશન 4.5 ટકા ડિવિડન્ડ યીલ્ડ ધરાવે છે.

બજાર ઘટતાં SIPના રોકાણમાં ખોટ

શેરબજારમાં થઇ રહેલા સતત ઘટાડાના કારણે શિસ્તબદ્ધ રીતે રોકાણ કરનારા રોકાણકારોને પણ નુકસાન સહન કરવું પડ્યું છે.

મ્યુચ્યુઅલ ફંડનો ઉપયોગ કરીને અને સિસ્ટમેટિક ઇન્વેસ્ટમેન્ટ પ્લાન (એસઆઇપી) દ્વારા પ્રથમ વખત ઇક્વિટીમાં મૂડી રોકનારા ઘણા લોકોનું વળતર નેગેટિવ થઇ ગયું છે. મ્યુચ્યુઅલ ફંડ વિતરક એન. જે. વેલ્થના ડેટા પ્રમાણે 154 ડાઇવર્સિફાઇડ ઇક્વિટી મ્યુચ્યુઅલ ફંડ સ્કીમ્સમાંથી 54માં એસઆઇપીનું વળતર છેલ્લા એક વર્ષમાં નેગેટિવ થઇ ગયું છે.

તમામ ફંડ હાઉસિસમાં આવા ફંડ્સમાં રોકાણકારોને એકથી 18 ટકા સુધી ખોટ સહન કરવી પડી છે. ઉદાહરણ તરીકે તમે છેલ્લા એક વર્ષમાં એચડીએફસી ઇક્વિટી ફંડમાં દર મહિને રૂ.10,000 રોક્યા હોય તો તમારા રૂ.1.20 લાખના રોકાણનું મૂલ્ય ઘટીને રૂ.1.15 લાખ થઇ ગયું હશે. જ્યારે આઇડીએફસી ઇક્વિટીમાં કરેલા રોકાણનું મૂલ્ય રૂ.1,12,727 થઇ ગયું હશે.

જોકે, મોટા ભાગના મિડ અને સ્મોલ કેપ ફંડ્સ સારો દેખાવ ચાલુ રાખ્યો છે અને સમાન ગાળામાં ઊંચું વળતર આપેલું છે. મોતીલાલ ઓસવાલ મિડકેપ 30 ફંડમાં આટલી જ રકમ રોકી હોય તો તેનું મૂલ્ય અત્યારે રૂ.1,34,390 થયું હોય જ્યારે ડીએસપી બ્લેકરોક માઇક્રોકેપ ફંડમાં રૂ.10,000ની એસઆઇપીનું મૂલ્ય (કુલ રૂ.1.20 લાખનું રોકાણ) અત્યારે રૂ.1,32,292 થયું હોય.

બજાજ કેપિટલમાં મ્યુચ્યુઅલ ફંડ્સ ખાતે એક્ઝિક્યુટિવ વાઇસ પ્રેસિડન્ટ અને નેશનલ હેડ સુરજિત મિશ્રાએ જણાવ્યું કે, "રોકાણકારોએ લોંગ ટર્મ માટે ઇક્વિટીમાં રોકાણ કરવું જોઈએ જેમાં રોકાણનો ગાળો ત્રણ વર્ષથી વધારે હોવો જોઈએ. ટૂંકા ગાળામાં વોલેટિલિટીના કારણે વળતર નેગેટિવ હોઈ શકે છે. પરંતુ તેનાથી રોકાણકારોએ ચિંતા કરવી ન જોઈએ." તેઓ રોકાણકારોને લાર્જ કેપ ફંડ્સમાં એસઆઇપી ચાલુ રાખવાની સલાહ આપે છે. તેઓ એસઆઇપીની રકમ વધારવાની પણ ભલામણ કરે છે જેથી બજાર ઘટેલું હોય ત્યારે વધુમાં વધુ યુનિટ ખરીદી શકાય અને બજાર વધે ત્યારે વધુ ફાયદો થાય.

થિંક કન્સલ્ટન્ટ્સના ચીફ ફાઇનાન્શિયલ પ્લાનર રણજિત દાણીએ કહ્યું કે, રોકાણકારોએ પોતાના પોર્ટફોલિયોમાં લાર્જ કેપ અને મિડ કેપ ફંડ્સનું સંતુલન જાળવવું જોઈએ.

લાર્જ કેપ કંપનીઓની સરખામણીમાં મિડ કેપ કંપનીઓમાં વધારે જોખમ રહેલું છે. લાર્જ કેપ કંપનીઓ વૈશ્વિક પરિબળોનો વધુ સારી રીતે સામનો કરી શકે છે જ્યારે મિડ કેપ કંપનીઓમાં આવી ક્ષમતા હોતી નથી.

એડેલવેઇસ મ્યુચ્યુઅલ ફંડના એમડી અને સીઇઓ વિકાસ સચદેવાએ જણાવ્યું કે, "રોકાણકારોએ બાળકોના શિક્ષણ, લગ્ન અથવા નિવૃત્તિ વગેરેને ધ્યાનમાં રાખીને લાંબા ગાળાના લક્ષ્ય પ્રમાણે એસઆઇપી કરવી જોઈએ. તેમણે ટૂંકા ગાળાની વોલેટિલિટીથી વિચલિત થવું ન જોઈએ. રોકાણ ચાલુ રાખો અને એસઆઇપીને સારો દેખાવ કરવા માટે સમય આપો."

એસઆઇપીમાં તમે દર મહિને ચોક્કસ તારીખે ચોક્કસ રકમ રોકી શકો છો. તેનાથી વોલેટિલીટીનો સામનો વધુ સારી રીતે કરી શકાય છે.

અંબાજીમાં આ પૂનમે તૂટશે છ-છ વર્લ્ડ રેકૉર્ડ?

બાવીસમી સપ્ટેમ્બરથી શરૂ થશે ભાદરવી પૂનમનો મેળો : વિશ્વમાં સૌથી મોટો લાડવો, સાત દિવસ સુધી સુગંધ પ્રસરાવતી સૌથી મોટી અગરબત્તી અને સૌથી મોટી ધજા સહિત નવા રેકૉર્ડ બનશે

આ વર્ષે ભાદરવી પૂનમના મેળાને યાદગાર બનાવવા માટે વિશ્વપ્રસિદ્ધ યાત્રાધામ અંબાજીમાં અંબે માતાના મંદિરમાં ગિનેસ વર્લ્ડ રેકૉર્ડ માટેની તૈયારીઓ હાથ ધરવામાં આવી છે. પ્રસાદ તરીકે ભાવિકોને વહેંચવા માટે વિશ્વમાં સૌથી મોટો લાડવો, સતત ૭ દિવસ સુધી સુગંધ પ્રસરાવતી સૌથી મોટી અગરબત્તી અને સૌથી મોટી ધજા સહિત એકસાથે ૬-૬ વર્લ્ડ રેકૉર્ડ માટેની શક્યતાઓ વિચારાઈ રહી છે અને એ માટે વર્લ્ડ રેકૉર્ડની ચકાસણી કરવામાં આવી રહી છે. જોકે એને આખરી ઓપ આપવાનો બાકી છે.

ભાદરવી પૂનમનો મેળો ૨૨થી ૨૮ સપ્ટેમ્બર સુધી યોજાશે, જેમાં મેળામાં સિલ્કના કાપડમાંથી ૧૫૦૦ ફુટ લાંબી અને ૯ ફુટ ઊંચી ‘જય માતાજી’ લખેલી ધજા બનાવવામાં આવશે. ૬૧ ફુટ લંબાઈવાળી સુગંધિત અગરબત્તી બનાવવાની વિચારણા થઈ રહી છે.

વળી ૧૧,૧૧૧ કિલોનો બુંદીનો એક મોટો લાડુ પણ બનાવવામાં આવશે. એ ઉપરાંત એક દિવસમાં એક લાખ ભાવિકો દર્શન કરવાનો, એક દિવસમાં એક લાખ શ્રીફળ વધેરવાનો અને મંદિરમાં મહાઆરતીનો વર્લ્ડ રેકૉર્ડ બનાવવા માટે પણ વિચારણા થઈ રહી છે. હાલમાં શ્રી આરાસુરી અંબાજી માતા દેવસ્થાન ટ્રસ્ટમાં બેઠકોનો દોર ચાલ્યો છે અને અત્યાર સુધીમાં

૩ બેઠકો યોજાઈ પણ ગઈ છે. અંબાજીમાં જુદા-જુદા ૬ વર્લ્ડ રેકૉર્ડ કરવા વિશે ગિનેસ વર્લ્ડ રેકૉર્ડની ચકાસણી પણ થઈ રહી છે.

શ્રી આરાસુરી અંબાજી માતા દેવસ્થાન ટ્રસ્ટના વહીવટદાર અને નાયબ કલેક્ટર ઘનશ્યામ બ્રહ્મભટ્ટે ‘મિડ-ડે’ને કહ્યું હતું કે ‘સરકારમાંથી મંજૂરી લેવા સહિતનાં ઘણાં બધાં પાસાં હજી વિચારવાનાં છે. જોકે ફાઇનલ થાય એ પછી એની જાહેરાત કરવામાં આવશે. અત્યારે એટલું કહી શકાય કે ટેન્ડરિંગ કર્યું છે, પણ સરકારમાં મંજૂરી લેવામાં આવશે.’

કરેક્શનમાં ટૂંકાગાળે ખરીદી કરવાનો સમય આવી ગયો: નિલેશ શાહ

સપ્તાહના પહેલા દિવસે ભારતીય બજારોની શરૂઆત સારી તેજીની સાથે થઈ છે. જો કે આજે એશિયાઈ બજારોમાં થોડી કમજોરીની સાથે કારોબાર કરી રહ્યા છે પરંતુ ઘરેલૂ બજાર તેનાથી દૂર રહ્યા અને શાનદાર તેજીની સાથે કારોબાર કરી રહ્યા છે. સેન્સેક્સમાં 155 અંકોનો ઉછાળો જોવામાં આવી રહ્યો છે અને નિફ્ટી પણ 42 અંક વધીને 7700 ની ખુબજ નજીક આવી ગયા છે. મિડકેપ અને સ્મૉલકેપ શેરોમાં પણ થોડો વધારો દર્જ કરવામાં આવી રહ્યો છે. માર્કેટની આગળની ચાલ પર ચર્ચા કરવા જોડાઈ રહ્યા છે કોટક મહિન્દ્રા મ્યુચ્યુઅલ ફંડના એમડી એન્ડ સીઈઓ નિલેશ શાહ પાસેથી.

નિલેશ શાહનું કહેવુ છે કે જ્યારે રોકાણકાર માર્કેટની વિરૂદ્ધ જવાની કોશિશ કરે છે ત્યારે ટૂંકાગાળે અસર થાય. કરેક્શનમાં ટૂંકાગાળે ખરીદી કરવાનો સમય આવી ગયો છે. ભારત-ચીનને એકમેકના હરિફ તરીકે વૈશ્વિક સ્તરે જોવામાં આવે છે. ચીનમાં યુઆનનો ડિવેલ્યુએશનનો અનુભવ 1993થી ચાલુ છે. ચીનમાં 1993માં 40% જેટલું અચાનક જ અવમૂલ્યન કરાયું હતું. ચીનમાં આવતી મુશ્કેલી આપણા માર્કેટ્સ અને અર્થતંત્ર માટે સારી તક જ છે. ભારતમાં મોંઘવારી ઊંચી હોવાથી રૂપિયામાં નરમાશ સારી બાબત કહેવાય.

નિકાસને ટેકો આપવા માટે રૂપિયાનું અવમૂલ્યન થવા દેવું જોઈએ. ક્રૂડમાં એકાદ-બે સપ્તાહની ચાલ પર નહીં, પણ દોઢ-બે વર્ષના ઘટાડા પર ફોકસ. સરકાર દ્વારા મૂડીરોકાણને ક્રૂડના ભાવ ઘટતાં ટેકો મળ્યો છે. જે સંકેતની ખૂબ જ ચર્ચા થઈ હોય એ ખરેખરમાં થાય ત્યારે એટલી અસર નથી થતી. એફઓએમસી દ્વારા વ્યાજદરમાં વધારાના નિર્ણયની અસર માર્કેટ્સમાં થઈ ચૂકી છે.

અર્થતંત્ર-માર્કેટને આરબીઆઈ દ્વારા વ્યાજદરના ઘટાડાથી અનેક ફાયદા થશે. નાણાકીય વર્ષ 2017 ના પરિણામોમાં વ્યાજદરમાં ઘટાડાની પોઝિટિવ અસર. જ્યારે બેન્ક 1% વ્યાજદર ઘટાડે ત્યારે કંપનીઓનો નફો 7% જેટલો વધી શકે છે. બેન્ક વચ્ચે વ્યાજદરમાં ઘટાડાની હોડ ચાલી રહી હોય એમ લાગતું નથી.

ખાનગી બેન્કને ક્રેડિટ ગ્રોથને લગતી કોઈ સમસ્યા નથી, પીએસયુ બેન્ક માટે પડકાર. પીએસયુ બેન્કમાં ઉચ્ચ કક્ષાની ટૅલન્ટ લાવવાની ખાસ જરૂરિયાત. પબ્લિક સેક્ટર બેન્કમાં નીચા વેલ્યુએશનને જોતાં રોકાણ કરવાની ઉતાવળ ન કરવી. હાલ ખાનગી બેન્ક અને એનબીએફસીએસમાં રોકાણ કરવાની તક. આવતા 6 મહિનામાં ઇક્વિટી અને ડેટ ફંડ્સના રિટર્ન સરખા હશે.

રિટેલ રોકાણકારોનો હિસ્સો હવે 45%થી ઘટી 8% પર આવી ગઈ છે. એનએફમાં હાલ 78 લાખ લોકો રૂપિયા 25-30 હજાર કરોડનું રોકાણ કરે છે. એમએફ, એલઆઈસી, પ્રાઇવેટ ઇન્શ્યોરન્સ અને બેન્ક આવનારા 5 વર્ષમાં રૂપિયા 9 લાખ કરોડ રોકશે. ક્વાર્ટર 2 નાણાકીય વર્ષ 16 માં પરિણામોમાં ખાસ સુધારો જોવા મળે એવી શક્યતા નથી.

કટોકટીમાં ધીરજ જાળવીને રોકડ ભંડોળ ટકાવી રાખો

ચીનની કટોકટીની ભારત અને બાકીના વિશ્વ પર ચોક્કસ અસર થશે. સામાન્ય રોકાણકારોએ જીવનની સુખદ પળને યાદ કરવી જોઈએ અને ધીરજ સાથે આ તોફાનનો સામનો કરવો જોઈએ,
એમ ઉમા શશિકાંત જણાવે છે.

આપણને યથાવત્ સ્થિતિ ગમે છે, પરંતુ આપણે પરિવર્તન પણ આવકારીએ છીએ. પરિવર્તનની રીત અનોખી હોય છે. તે દરેક વખતે અલગ અલગ પદ્ધતિથી આવે છે. યુદ્ધની જેમ પ્રચંડ વેગ સાથે પરિવર્તન આવે ત્યારે તે મોટા પાયે વિનાશ કરે છે અને નવી શરૂઆતની તક છોડે છે. કટોકટી બિલ્લી પગે આવે છે અને પછી તેમાં વેગ આવે છે.

ચીનના બજારમાં તીવ્ર કડાકો પૂર્ણકક્ષાની કટોકટી છે, જેની વિશ્વભરના રોકાણકારોને અસર થઈ શકે છે. ચીનના બજારમાં છેલ્લા 15 મહિનામાં અસાધારણ તેજી આવી હતી. તેમાં સ્થાનિક નાગરિકોની મોટી ભાગીદારી હતી. જાન્યુઆરી 2015 પછી આશરે ત્રણ કરોડ નવાં ટ્રેડિંગ એકાઉન્ટ ખૂલ્યાં છે.

માર્જિન ટ્રેડિંગની મંજૂરી (ફાઇનાન્સ કંપની પાસેથી લોન લઈને શેરોમાં ટ્રેડિંગ)થી તેજીનો ફુગ્ગો બન્યો હતો. આઇપીઓમાં જોરદાર ખરીદીથી સામાન્ય વ્યક્તિ પણ સટોડિયા બન્યા હતા. ઘણાએ ઘર ગીરવે મૂકીને શેરો ખરીદ્યા હતા. તેજીનો ફુગ્ગો હવે ફૂટ્યો છે. બજારમાં 30 ટકાનો ઘટાડો થયો છે અને તેમાં હજુ પણ ઘટાડો થઈ રહ્યો છે.

બજારમાં સરકારની મોટા પાયે દરમિયાનગીરી જોવા મળી છે, જે અગાઉ ક્યારેય જોવા મળ્યું નથી. ચીન હવે બજારને મુક્ત કરી રહ્યું છે તેવી બે વર્ષ પહેલાંની સરકારની જાહેરાત બાદ હવે સરકાર દાવો કરી રહી છે કે બજારમાં તીવ્ર વેચવાલી નુકસાનકારક છે. સરકાર સેલર્સ પર નિયંત્રણો મૂક્યાં છે, જે સફળ થયાં નથી. કટોકટીમાં લોકો હંમેશા વેચાણ કરતા હોય છે. સરકારના પ્રતિબંધથી બીજી એસેટમાં પણ વેચવાલી જોવા મળી હતી.

ચીનના બજારના પતનથી એકબીજા સાથે જોડાયેલા વિશ્વની કેટલીક નબળાઈ બહાર આવી છે. કોમોડિટીના ભાવ ઘટી રહ્યા છે. ઓસ્ટ્રેલિયા, રશિયા અને લેટિન અમેરિકા જેવાં કોમોડિટી આધારિત અર્થતંત્રો પર તેની તીવ્ર અસર થશે. કોમોડિટીમાં મંદીથી લેટિન અમેરિકાને સૌથી વધુ ફટકો પડશે, કારણ કે તે અગાઉથી નીચી વૃદ્ધિ અને ઘટતી નિકાસનો સામનો કરી રહ્યું છે. કપરા સમયમાં આકરા નિર્ણયો કરવા પડે છે. આ દેશોની સરકાર આવાં પગલાં લઈ શકી નથી. કોમોડિટીમાં સંપૂર્ણ કક્ષાની કટોકટી ઊભરી રહી છે.

ભારત સહિતનાં એશિયાનાં અર્થતંત્રોમાં ધીમી વૃદ્ધિ હવે જૂના સમાચાર છે. ચીનના અર્થતંત્રમાં અસાધારણ વૃદ્ધિ બાદ હવે ઘટાડો થઈ રહ્યો છે. એશિયાના બાકીના અર્થતંત્રમાં પણ આવી સ્થિતિ છે.

આ તમામ ઘટનાથી ભારતના રોકાણકારોને કેવી રીતે અસર થશે? ભારતે આત્મસંતુષ્ટ થવું જોઈએ નહીં. વૈશ્વિક કટોકટીથી આર્થિક વૃદ્ધિ અને કંપનીઓની નફાકારકતા ઘટે છે. આપણે આયાતકર્તા દેશ છીએ તથા ક્રૂડ ઓઇલ અને બીજી કોમોડિટીના ભાવમાં ઘટાડાથી લાભ થશે.

ભારત વધુ નિકાસ પણ કરતું નથી. ભારતમાં કટોકટી વખતે આકરા નિર્ણય કરી શકે તેવી સરકાર પણ છે. જોકે વૈશ્વિક કટોકટી લિક્વિડિટીની માગ મારફત આવે છે. અનિશ્ચિતતા વધે છે ત્યારે રોકાણકારો જોખમી એસેટનું વેચાણ કરે છે. ભારતના શેરબજાર અને બોન્ડ માર્કેટમાં વેચવાલી આવી શકે છે. તેનાથી રૂપિયા પર દબાણ આવશે. આપણે આયાતનો ખર્ચ કાઢી શકીએ તેટલા ડોલરની કમાણી કરતા નથી.

તેથી વૈશ્વિક મૂડી પર આધાર રાખવો પડે છે. રિઝર્વ બેન્કે ફોરેક્સ રિઝર્વમાં વધારો કરીને વ્યાજદરમાં કપાતને વિલંબમાં નાંખ્યો છે. રિઝર્વ બેન્ક ચલણને બચાવવા લડત આપી રહી છે, પરંતુ રૂપિયામાં ઘટાડાને સંપૂર્ણપણે રોકી શકી નથી.

કટોકટીના સમયમાં સોનામાં તેજી આવે છે તેવું વિચારતા લોકોએ આ હકીકત યાદ રાખવી જોઈએ. 2009થી સોનાની ખરીદી થઈ રહી છે અને મોટા ભાગના પોર્ટફોલિયોમાં તે ઓવરવેઇટ છે. તેથી સોનામાં વેચાણની પણ શક્યતા રહે છે.

ડોલરમાં મજબૂતાઈ અને કોમોડિટીમાં નરમાઈના કિસ્સામાં સોનામાં તેજીની જગ્યાએ મંદીની શક્યતા વધુ રહે છે. વૈશ્વિક રોકાણકારો લિક્વિડિટી માટે ધસારો કરે છે ત્યારે તમામ એસેટ કલાસમાં ઘટાડો થાય છે.

ચીન અને ગ્રીસ જેવી કટોકટીથી વિશ્વના તમામ દેશોને અસર થઈ શકે છે અને આપણે કલ્પના પણ ન કરી હોય તેવાં પરિવર્તન આવે છે. તેથી તોફાનના સમયમાં સાહસ કરવાની જગ્યાએ ધીરજ રાખવી વધુ યોગ્ય છે. કટોકટીમાં રોકાણકારોએ ધીરજ રાખવી જોઈએ અને રોકડ ભંડોળ હાથ પર રાખવું જોઈએ.

કોર્પોરેટ ડેટમાં MFના રોકાણના નિયમો આકરા બનાવાશે

કેટલાંક ફિકસ્ડ ઇનકમ પોર્ટફોલિયોમાં અતિશય ક્રેડિટ રિસ્કની ચિંતાને પગલે સેબીએ કોર્પોરેટ ડેટ પેપર્સમાં મ્યુચ્યુઅલ ફંડ્સના રોકાણના નિયમોને આકરા બનાવાની યોજના બનાવી છે. મૂડીબજારની નિયમનકારી સંસ્થા સેબી વ્યક્તિગત કંપનીની ડેટ સિક્યોરિટીઝમાં મ્યુચ્યુઅલ ફંડ્સના રોકાણની મર્યાદામાં ઘટાડો કરવાની વિચારણા કરી રહી છે.

હાલના નિયમો મુજબ કોઇ એક મ્યુચ્યુઅલ ફંડ્સ સ્કીમ સિંગલ ઇશ્યૂકર્તાના ડેટ ઇન્સ્ટ્રુમેન્ટમાં નેટ એસેટ વેલ્યૂના ૧૫ ટકાથી વધુ રોકાણ કરી શકતી નથી. ક્રેડિટ રેટિંગ એજન્સીએ ઇન્વેસ્ટમેન્ટ ગ્રેડથી નીચું રેટિંગ આપ્યું છે તેવા ઇશ્યૂકર્તાના ડેટ પેપર્સને આવા નિયમ લાગુ પડે છે. જોકે આવી મર્યાદાને ટ્રસ્ટીની પૂર્વ મંજૂરી સાથે વધારીને ૨૦ ટકા કરી શકાય છે.

હવે સેબી માને છે કે આ મર્યાદા ઘણી ઊંચી છે, કારણ કે કેટલાંક મ્યુચ્યુઅલ ફંડ્સ નીચું રેટિંગ ધરાવતા ડેટ પેપર્સની મોટાપાયે ખરીદી કરે છે.

આ ગતિવિધિથી માહિતીગાર એક વ્યક્તિએ જણાવ્યું હતું કે "ડેટ પેપર્સનો સપ્લાય ઘણો ઓછો હતો, ત્યારે આ નિયમો ઘડવામાં આવ્યા હતા. પરંતુ હાલમાં ઘણા ડેટ પેપર્સ બજારમાં આવી રહ્યા છે. તેથી હાલની નીતિની સમીક્ષા કરવાનો સમય થઈ ગયો છે."

જેપી મોર્ગન એસેટ મેનેજમેન્ટની બે ડેટ સ્કીમ્સ આનું ઉદાહરણ છે. ઇન્ડિયા ટ્રેઝરી ફંડ અને ઇન્ડિયા શોર્ટ ટર્મ ઇનકમ ફંડ્સ સહિતની આ બે સ્કીમને તાજેતરમાં ઓટો એન્સિનિયરી કંપની એમટેક ઓટોના શેરના ભાવમાં તીવ્ર ઘટાડાને કારણે ફટકો પડ્યો છે. આ ઘટનાથી સેબીની પગલાં લેવાની ફરજ પડી છે. આ બંને સ્કીમ્સના આશરે 200 કરોડ અથવા એયુએમના આશરે છ ટકાનું ભંડોળ એમટેક ઓટોમાં રોકાણ કરવામાં આવ્યું હતું.

ટોચની ક્રેડિટ રેટિંગ એજન્સીએ એમટેક ઓટોના રેટિંગમાં ઘટાડો કર્યા બાદ જે પી મોર્ગનને ફંડ્સનું વેલ્યૂ 'માર્ક-ટુ માર્કેટ' કરવું પડ્યું હતું. હવે જેપી મોર્ગન ડિફોલ્ટની અણી પર છે, કારણ કે ડેટ પેપર્સની મુદત સપ્ટેમ્બરમાં પૂરી થાય છે.



સૂત્રોએ જણાવ્યું હતું કે ફંડ મેનેજર્સે માત્ર રેટિંગને આધારે રોકાણનો નિર્ણય કરવો જોઇએ નહીં, ફંડ મેનેજર્સ પોતાની રીતે પણ મૂલ્યાંકન કરવું જોઇએ. સેબી માને છે કે તાજેતરની ઘટનાને માત્ર એક ઘટના માનીને તેની અગવણના કરી શકાય નહીં. સેબીએ કેટલાંક ફંડ્સ હાઉસિસ પાસેથી ચોક્કસ ક્ષેત્રો અને ડેટ પેપર્સમાં તેમના રોકાણ અંગેની માહિતી માંગી છે.

નિયમો મુજબ ફંડ હાઉસિસ નોન બેન્કિંગ ફાઇનાન્સ કંપનીઓમાં 40 ટકાથી વધુ રોકાણ કરી શકે નહીં. સેબીએ જોખમી ગણાતા રિયલ એસ્ટેટ ક્ષેત્રના ડેટ પેપર્સમાં રોકાણ ન કરવા મ્યુચ્યુઅલ ફંડ્સની અનૌપચારિક સૂચના આપી છે. સેબી ગયા સપ્તાહે ચોક્કસ કંપની કે ક્ષેત્રમાં વધુ રોકાણ ન કરવા ફંડ મેનેજર્સને સૂચના આપી હતી.

રૂપિયો ઘટતાં NRIsએ ભારતમાં વધુ ડોલર ઠાલવ્યા

રૂપિયામાં સતત ઘટાડો ચાલુ છે ત્યારે બિનનિવાસી ભારતીયો (NRIs) ડોલર અને રૂપિયા વચ્ચેના ‌ફરકનો લાભ લેવા વધુ ને વધુ ડોલર ભારતમાં ઠાલવી રહ્યા છે, જેના પગલે છેલ્લા અઠવાડિયામાં જ રેમિટન્સની આવકમાં 70 ટકા સુધીનો ઉછાળો આવ્યો છે. ડોલર સામે રૂપિયો બુધવારે 63.61 પર બંધ રહ્યો હતો, જે મંગળવારના 63.53 પર 0.08 વધારે હતો.

આંતરરાષ્ટ્રીય પેમેન્ટ સર્વિસ પ્રોવાઇડર યુએઇ એક્સ્ચેન્જે જણાવ્યું હતું કે, ફક્ત છેલ્લા અઠવાડિયામાં જ એક્સ્ચેન્જ પર ઊંચી મૂલ્યના રેમિટન્સના વોલ્યુમમાં 70 ટકાનો ઉછાળો જોવા મળ્યો છે. યુએઇ એક્સ્ચેન્જના ટ્રેઝરી વિભાગના વાઇસ પ્રેસિડન્ટ અશ્વિન શેટ્ટીએ કહ્યું હતું કે, "આ પ્રકારના નાણાકીય વ્યવહારોમાં 20 ટકા સુધીનો વધારો જોવા મળ્યો છે, છતાં અમને વોલ્યુમની દૃષ્ટિએ ઊંચા મૂલ્યના રેમિટન્સમાં 70 ટકા સુધીનો વધારો જોવા મળ્યો છે." તેમણે ઉમેર્યું હતું કે, બિનનિવાસી ભારતીયો રૂ.25 લાખથી રૂ.5 કરોડ વચ્ચે રેમિટિંગ કરાવી રહ્યા છે.

ગયા વર્ષે દેશમાં રેમિટન્સની આવકની દૃષ્ટિએ 70 અબજ ડોલરની જંગી રકમ આવી હતી અને ભારતે રેમિટન્સની આવકમાં વિશ્વમાં ટોચનું સ્થાન મેળવ્યું હતું. ભારત પછી 60 અબજ ડોલરની રેમિટન્સ આવક મેળવીને બીજું સ્થાન મેળવ્યું હતું અને 25 અબજ ડોલર સાથે ફિલિપાઇન્સ ત્રીજા સ્થાને હતો. વર્ષ 2012માં ભારતે રેમિટન્સ સ્વરૂપે 69 અબજ ડોલરની આવક કરી હતી અને વિશ્વ બેન્કના જણાવ્યા મુજબ, ચાલુ વર્ષે રેમિટન્સની આવક સર્વોચ્ચ સપાટીને આંબી જશે.

એક્સપ્રેસ મનીના વાઇસ પ્રેસિડન્ટ અને બિઝનેસ હેડ સુદેશ ગિરિયાને કહ્યું હતું કે, રૂપિયામાં ઘટાડાની રેમિટન્સની આવક પર હકારાત્મક અસર થઈ છે અને ઊંચી નેટવર્થ ધરાવતી વ્યક્તિઓ (HNIs) વધુ ને વધુ ડોલર દેશમાં ઠાલવી રહ્યા છે.

અમે ઊંચા મૂલ્ય ધરાવતા રેમિટન્સના વોલ્યુમમાં 15થી 20 ટકાનો ઉછાળો જોયો છે." તેમણે જણાવ્યું હતું કે, ઊંચી નેટવર્થ ધરાવતી વ્યક્તિઓ પાસે ઊંચી ખર્ચપાત્ર આવક છે અને રૂપિયો ઘટે છે ત્યારે તેનો ફાયદો ઉઠાવવાની તકની રાહ જોતા હોય છે. તેમણે કહ્યું હતું કે, "તેઓ ભંડોળનો સંચય કરે છે અથવા સસ્તા દરે સંબંધિત દેશોની બેન્કો પાસેથી ઋણ લે છે અને પછી તેને ભારતમાં મોકલે છે."

દરમિયાન રૂપિયો બુધવારે સતત ત્રીજા દિવસે ઘટ્યો હતો અને ડોલર સામે 63.61 પર બંધ રહ્યો હતો. ઇન્ટબેન્ક ફોરેન એક્સ્ચેન્જ (ફોરેક્સ) બજારમાં રૂપિયો રૂ.63.80ની નીચી સપાટીએ ખૂલ્યો હતો. પછી ધીમે ધીમે 63.89ની સપાટીએ પહોંચી ગયો હતો. પણ નિકાસકારો દ્વારા ડોલર અને ઇક્વિટીના વેચાણને પગલે થોડો સુધારો થયો હતો અને 63.61 પર બંધ રહ્યો હતો.