સર્વસહમતી સ્થપાય પછી જ રિટેલમાં FDI લાવવા નિર્ણય

મલ્ટિ-બ્રાન્ડ રિટેલમાં 51 ટકા એફડીઆઇના નિર્ણયનો સાથીપક્ષો તથા વિરોધપક્ષો દ્વારા ભારે વિરોધ થતા મનમોહન
સિંઘ સરકારે નમતું જોખવું પડ્યું છે. નાણા મંત્રી પ્રણવ મુખરજીએ લોકસભામાં જાહેરાત કરી હતી કે , રિટેલમાં એફડીઆઇને છુટ આપવા અંગે વિચારવિમર્શ દ્વારા સર્વસહમતી સધાય ત્યાં સુધી નિર્ણયને મોકુફ રાખવામાં આવ્યો છે.

આ અંગે રાજકીય પક્ષો અને રાજ્યો સાથે વાટાઘાટ કરવામાં આવશે.વાણિજ્ય મંત્રી આનંદ શર્માએ પણ રાજ્ય સભામાં આવું જ નિવેદન આપ્યું હતું. તેના કારણે સંસદમાં સ્થિતિ સામાન્ય થઇ છે જ્યાં છેલ્લા નવ દિવસથી વિપક્ષોની ધમાલના કારણે કોઇ કાર્યવાહી થઈ શકી ન હતી.

સંસદમાં ઉગ્ર વિરોધ અને તૃણમુલ કોંગ્રેસની નારાજગીના કારણે લેવાયેલા નિર્ણયથી વડાપ્રધાનને આંચકો લાગ્યો છે. તેમણે નીતિવિષયક ફેરફાર માટે એફડીઆઇને મહત્ત્વનો મુદ્દો ગણાવ્યો હતો.