નબળા આર્થિક આંકડાના લીધે રૂપિયો બે માસના તળિયે

ઔદ્યોગિક ઉત્પાદનના નબળા આંકડા , વિક્રમ સ્તરે વધેલી વ્યાપાર ખાધ અને ઊંચે ગયેલા ફુગાવાના કારણે રૂપિયો ઇન્ટ્રા - ડે 55 ના સ્તરની નીચે જઈને 13 પૈસાના ઘટાડા સાથે બે માસની નવી નીચી સપાટી 54.88 પર બંધ રહ્યો હતો .

ફોરેક્સ બ્રોકરોએ જણાવ્યું હતું કે આયાતકારો દ્વારા ડોલરની સતત માગ , નવું વિદેશી રોકાણ ઘટવા સાથે સ્થાનિક શેરોમાં નબળાઈથી રૂપિયાને અસર થઈ હતી . ફોરેક્સ માર્કેટમાં રૂપિયો ગયા શુક્રવારના બંધ 54.75 થી સોમવારે ડોલર સામે 54.68 પર ખૂલ્યો હતો અને શેરબજારમાં પ્રારંભિક મજબૂત વલણના કારણે વધીને 54.61 થયો હતો .

પરંતુ સપ્ટેમ્બરના આઇઆઇપીના આંકડામાં અનપેક્ષિત 2.5 ટકાનો ઘટાડો , 9.75 ટકાની ઊંચી સપાટી પર રિટેલ ફુગાવો અને વ્યાપાર ખાધ 20.96 અબજ ડોલરના વિક્રમ સ્તરે પહોંચતાં રૂપિયો ગબડીને 55.12 ના તળિયે અડ્યો હતો . અંતે તે સાધારણ સુધરીને 13 પૈસા (0.24 ટકા ) ના ઘટાડા સાથે 54.88 પર બંધ આવ્યો હતો .