મોદી જ PM ઉમેદવાર

નવી દિલ્હી : ભાજપમાં નરેન્દ્ર મોદીને વડાપ્રધાનના ઉમેદવાર બનાવવા માટેની માંગણીને સોમવારે વધુ વેગ મળ્યો છે .

ભૂતપૂર્વ નાણાપ્રધાન યશવંત સિંહાએ પક્ષના નેતૃત્વને વર્ષ 2014 માં પ્રસ્તાવિત લોકસભાની ચૂંટણી માટે મોદીને વડાપ્રધાનપદના ઉમેદવાર જાહેર કરવાની અપીલ કરી હતી તેમજ જનતા દળ ( યુ ) ના વિરોધની પરવા કર્યા વિના મોદીના નેતૃત્વમાં લોકસભાની ચૂંટણી માટે આગળ વધવું જોઈએ તેવો અભિપ્રાય પણ વ્યક્ત કર્યો હતો .

સિંહાની આ અપીલને પગલે ભાજપના કેન્દ્રીય નેતાઓ પર વડાપ્રધાનપદના ઉમેદવાર અંગે સ્પષ્ટતા કરવાનું દબાણ વધ્યું છે . જોકે , ભાજપના પ્રમુખ રાજનાથ સિંહ વડાપ્રધાનપદનો નિર્ણય સંસદીય બોર્ડ દ્વારા લેવાશે તેવી સ્પષ્ટતા કરી હતી .

સિંહાએ સોમવારે કહ્યું હતું કે , નરેન્દ્ર મોદીના કરિશ્માથી ભાજપને ફાયદો થશે . અમારા કાર્યકર્તાઓ મોદીને વડાપ્રધાનપદના ઉમેદવાર જાહેર કરવાની માંગણી કરી રહ્યા છે . તેનાથી ભાજપને લાભ જ થશે .

જોકે પક્ષે સત્તાવાર રીતે એ અભિગમ જાળવી રાખ્યો છે કે એનડીએના ઘટક પક્ષો સાથે વિસ્તૃત ચર્ચા કર્યા પછી જ આ મુદ્દે નિર્ણય લેવાશે , કારણ કે મોદીને આગળ કરવાથી જનતા દળ ( યુ ) તેમજ વડાપ્રધાન બનવાની મહત્ત્વાકાંક્ષા સેવતા ભાજપના વરિષ્ઠ નેતાઓમાં જ સંઘર્ષ થવાનું જોખમ છે .

દરમિયાન ભાજપના પ્રમુખ રાજનાથ સિંહે નાગપુરમાં કહ્યું હતું કે , નરેન્દ્ર મોદી લોકપ્રિય નેતા છે તેમાં બેમત નથી . પણ ભાજપમાં આ પ્રકારનો નિર્ણય પક્ષની કેન્દ્રિય સંસદીય બોર્ડ દ્વારા લેવાની વ્યવસ્થા છે .

યશવંત સિંહાએ જનતા દળ ( યુ ) ના વિરોધની પણ ચિંતા ન કરવા જણાવ્યું છે . તેમણે કહ્યું હતું કે , '' ભાજપે તેના રાજકીય નિર્ણયો માટે જનતા દળ ( યુ ) ને વશ ન થવું જોઈએ . ભાજપ સ્વતંત્ર રાજકીય પક્ષ છે . તેના નેતૃત્વનો નિર્ણય બહારના રાજકીય પક્ષો કે નેતાઓ ન કરી શકે .

તેઓ એનડીએનું નેતૃત્વ કરવા માટે મોદી પાસે યોગ્ય લાયકાત ન હોવાની નીતીશ કુમારની ટિપ્પણીઓ પણ વાજબી ન હોવાનું માને છે . તેમણે કહ્યું હતું કે , જનતા દળ ( યુ ) એ એક નેતાને નિશાન ન બનાવવો જોઈએ . આપણે બધા કટ્ટર છીએ અથવા તો ધર્મનિરપેક્ષ છીએ .

સાથેસાથે તેમણે જનતા દળ ( યુ ) ને મહત્ત્વપૂર્ણ સાથીદાર પક્ષ પણ ગણાવ્યો હતો . તેમણે ઉમેર્યું હતું કે , જનતા દળ ( યુ ) અમારો સૌથી જૂનો સાથીદાર પક્ષ છે . તેમની સાથે જોડાણ કર્યું ત્યારે બિહારમાં ભાજપ પ્રદેશપ્રમુખ હું જ હતો .

બીજી તરફ જનતા દળ ( યુ ) એ યશવંત સિંહાના નિવેદન પર તીખી પ્રતિક્રિયા આપી હતી . પક્ષના પ્રવક્તા શિવાનંદ તિવારીએ કહ્યું હતું કે , એનડીએના નેતૃત્વનો નિર્ણય ઘટક પક્ષો લેશે . ભાજપે કહ્યું છે કે નેતૃત્વનો નિર્ણય સાથીદાર પક્ષો સાથે ચર્ચાવિચારણા કર્યા પછી એનડીએ દ્વારા લેવાશે .

જોકે જનતા દળ ( યુ ) ના એક નેતાએ સ્પષ્ટપણે કહ્યું હતું કે , અમે મોદીને લઈને અમારી સ્થિતિ સ્પષ્ટ કરી દીધી છે . ભાજપ વડાપ્રધાનપદના ઉમેદવાર તરીકે મોદીનું નામ જાહેર કરશે તો અમે ભાજપ સાથેનું જોડાણ તોડી નાંખીશું .