10 કર્મચારી હશે તોપણ કંપનીમાં EPFO હેઠળ

નવી દિલ્હી : સરકાર એમ્પ્લોયીઝ પ્રોવિડન્ટ ફંડ & ઓર્ગેનાઇઝેશન ( ઇપીએફઓ ) હેઠળ કંપનીને સામેલ કરવા માટે જરૂરી કર્મચારીઓની સંખ્યા હાલના 20 થી ઘટાડી 10 કરવાનું વિચારી રહી છે . આ પગલાનો લાભ વધુ 50 લાખ કર્મચારીઓને થવાની ધારણા છે .

શ્રમમંત્રાલયને ગયા સપ્તાહે લખેલા પત્રમાં ઇપીએફઓએ એમ્પ્લોયીઝ પ્રોવિડંટ ફંડ્સ એન્ડ મિસેલેનિયસ પ્રોવિઝન્સ ( ઇપીએફ એન્ડ એમપી ) એક્ટ , 1952 હેઠળ કર્મચારી , કંપની અને બેઝિક વેતનની વ્યાખ્યામાં ફેરફાર કરવાની ભલામણ કરી હતી .

ઇપીએફઓના એક વરિષ્ઠ અધિકારીએ ઇટીને જણાવ્યું હતું કે , સંગઠિત ક્ષેત્રમાં તો સામાજિક સુરક્ષાના લાભ દરેકને મળવા જોઈએ . દેશમાં સંગઠિત ક્ષેત્રનો અર્થ 10 કે વધુ કર્મચારી થતો હોવાથી ઇપીએફ એક્ટ હેઠળ સામેલ કરાતી કંપનીની વ્યાખ્યામાં ફેરફારની જરૂર છે .

અધિકારીના જણાવ્યા અનુસાર કર્મચારીની સંખ્યા 20 થી ઘટાડી 10 કરવાની દરખાસ્તને મંજૂરી મળશે તો વધુ 50 લાખ કર્મચારીને કંપની તરફથી સોશિયલ સિક્યોરિટીનો લાભ મળશે . અધિકારીએ જણાવ્યું હતું કે , મંત્રાલયને મોકલાયેલી ભલામણ કાયદામાં વ્યાપક સુધારાની પ્રક્રિયાનો એક ભાગ છે . ઇપીએફઓ એ શ્રમ અને રોજગાર મંત્રાલય હેઠળ એક કાનૂની સંસ્થા છે જે આઠ કરોડ સભ્યોની નિવૃત્તિ માટેની બચતનું સંચાલન કરે છે .