મોદી સરકારની આગાહીથી ઝવેરીઓના ચહેરા પર ચમક આવી

કેન્દ્રમાં નરેન્દ્ર મોદીની આગેવાની હેઠળ એનડીએ સરકારની પ્રબળ શક્યતાને કારણે દેશમાં ઝવેરીઓના ચહેરા પરનું સ્મિત પાછું ફર્યું છે . વેપારીઓને આશા છે કે , સ્થિર સરકાર યોગ્ય નીતિવિષયક નિર્ણયો લઈ શકશે અને 80:20 ગોલ્ડ સ્કીમને રદ કરશે .

ઇન્ડિયન બુલિયન એન્ડ જ્વેલરી એસોસિયેશનના વાઇસ પ્રેસિડન્ટ પૃથ્વીરાજ કોઠારીએ જણાવ્યું હતું કે , અમે ચૂંટણી પહેલાં ભાજપના અધ્યક્ષ રાજનાથ સિંઘ અને અન્ય વરિષ્ઠ નેતાઓને મળ્યા હતા અને તેમને ઉદ્યોગની સ્થિતિથી વાકેફ કર્યા હતા . અમે આયાત જકાતમાં ઘટાડો કરવાની માંગણી કરી નથી , પરંતુ 80:20 ગોલ્ડ સ્કીમને દૂર કરવા જણાવ્યું છે .

આ સ્કીમને લીધે બજારમાં સોનાની ઉપલબ્ધતામાં ઘટાડો નોંધાયો છે . કસ્ટમ્સ સત્તાવાળા કન્સાઇન્મેન્ટને ઝડપી મંજૂરી આપતા નથી અને એટલે પ્રીમિયમમાં વૃદ્ધિને કારણે સોનું મોંઘું બને છે . અમને આશા છે કે , નવી સરકાર યોગ્ય નિર્ણય કરશે . ઉલ્લેખનીય છે કે , સોનાની આયાત જકાત હાલ 10 ટકાના ઊંચા સ્તરે છે .

અગાઉ ભાજપે સોનાની દાણચોરીને પ્રોત્સાહન આપતાં આયાત પરના અંકુશ હળવા કરવાનો સંકેત આપ્યો હતો . તેને લીધે વેપારીઓમાં આશાવાદ વધ્યો છે .

કોઠારીએ જણાવ્યું હતું કે , સોનાની આયાત પરનાં નિયંત્રણ હળવાં કરાશે તો 10 ગ્રામ સોનાનો ભાવ ઘટીને રૂ .27,500 થશે . પુરવઠા આધારિત સમસ્યા ઉકેલાશે તો ભારતીયોને સોનાના વૈશ્વિક ભાવમાં ઘટાડાનો લાભ મળશે . વધુમાં રૂપિયાનું મૂલ્ય પણ ડોલર સામે વધ્યું છે . વૈશ્વિક બજારમાં સોનાનો ભાવ હાલ પ્રતિ ઔંસ 1,300 ડોલરની નીચે છે .

રિઝર્વ બેન્કે 22 જુલાઈએ જણાવ્યું હતું કે , સોનાની ખરીદીના દરેક લોટનો 20 ટકા હિસ્સો નિકાસ માટે ઉપલબ્ધ કરાવવાનો રહેશે . માત્ર 80 ટકાનો ઉપયોગ સ્થાનિક કામકાજ માટે અને ખાસ કરીને જ્વેલરી બિઝનેસમાં સંકળાયેલી એન્ટિટી , બુલિયન ડીલર્સ અને બેન્કો દ્વારા કરી શકાશે .

સોનાની આયાતમાં નોંધપાત્ર ઘટાડાને લીધે એપ્રિલમાં ભારતની વેપાર ખાધ નોંધપાત્ર ગબડી છે . ઉપરાંત , નિકાસમાં વૃદ્ધિને કારણે ચાલુ ખાતાની ખાધ પરનું દબાણ હળવું થયું છે . એપ્રિલમાં સોનાની આયાતમાં અગાઉના વર્ષના સમાન ગાળાની તુલનામાં 74.1 ટકાનો ઘટાડો નોંધાયો છે .

ઓલ ઇન્ડિયા જેમ એન્ડ જ્વેલરી ટ્રેડ ફેડરેશનના ચેરમેન હરેશ સોનીએ જણાવ્યું હતું કે , ચાલુ ખાતાની ખાધ ઘટી છે ત્યારે નવી સરકાર અમારી માંગણીને ધ્યાનમાં લેશે . આગામી સરકારે ગોલ્ડ લોન સ્કીમ દાખલ કરવી જોઈએ . જેને લીધે સોનાના ભાવની વધઘટ સામે હેજિંગની સુવિધા મળી શકે .

જેમ એન્ડ જ્વેલરી એક્સ્પોર્ટ કાઉન્સિલના ચેરમેન વિપુલ શાહે જણાવ્યું હતું કે , 2013-14 માં રત્નો અને આભૂષણોની નિકાસમાં 11 ટકાનો ઘટાડો નોંધાયો હતો . જોકે , ચાલુ નાણાકીય વર્ષે તે 18-20 ટકા વધી શકે . અમારા મતે સ્થિર કેન્દ્ર સરકાર બજારમાં સોનાના પુરવઠાને નિયમિત કરશે