જેટલી FM, રાજનાથ ગૃહપ્રધાન તરીકે ફેવરિટ

નવી દિલ્હી : સટોડિયા માટે ઇન્ડિયન પ્રીમિયર લીગ ( આઇપીએલ ) ફેવરિટ છે . જોકે , ચૂંટણી પરિણામ જાહેર થયા પછી પણ રાજકીય મોરચે સટ્ટાનું બજાર ઠંડું પડ્યું નથી . મીડિયાની અટકળો વચ્ચે બુકીઓને પણ મંત્રીમંડળના ટોચના ચાર હોદ્દામાં રસ છે . જેમાં ગૃહ , નાણામંત્રાલય , સંરક્ષણ અને વિદેશ મંત્રાલયનો સમાવેશ થાય છે . સટ્ટાના સંકેતો પરથી પત્રકારો અને સટોડિયા એક જ દિશામાં વિચારી રહ્યા હોવાનું જણાય છે .

સટ્ટામાં જોખમ જેટલું ઓછું , ભાવ પણ એટલો ઓછો . સટ્ટાના ભાવની ગણતરી એક રૂપિયાની ટકાવારીના આધારે કરાય છે . એનો અર્થ એ થયો કે , 20 પૈસાનો ભાવ એટલે જીતનારને રૂ .1.20 પાછા મળે છે . ઇટીએ ઘણા મોટા બુકીઓ સાથે વાટાઘાટ કરી હતી .

જેમ કે , સટોડિયા અત્યારે બે અરુણ પર ધ્યાન કેન્દ્રિત કરી રહ્યા છે . નાણાપ્રધાન તરીકે અરુણ જેટલીનો ભાવ ૨૦ પૈસા અને અરુણ શૌરીનો ભાવ ૨૫ પૈસા ચાલી રહ્યો છે . એટલે FM તરીકે જેટલીની શક્યતા વધુ છે . જોકે , ગૃહપ્રધાન તરીકે જેટલીનો ભાવ ૩૫ પૈસા અને વાણિજ્ય પ્રધાન તરીકે 25 પૈસાના સ્તરે છે .

અમૃતસરની બેઠક પર પરાજય છતાં જેટલીને મહત્ત્વનો પોર્ટફોલિયો મળવાની શક્યતા પર ખાસ અસર થઈ નથી . જોકે , રાજનાથ સિંહ ગૃહપ્રધાન તરીકે સૌથી સુરક્ષિત જણાય છે . આ હોદ્દા માટે ભાજપ પ્રમુખનો ભાવ 15 પૈસા ચાલી રહ્યો છે . ગૃહપ્રધાન તરીકે જનરલ વી કે સિંઘનો ભાવ 60 પૈસા અને નીતિન ગડકરીનો ભાવ 50 પૈસા છે .

નારાજગીની અટકળો વચ્ચે સટ્ટા બજાર સુષ્મા સ્વરાજને વિદેશ મંત્રાલય મળશે એવો સંકેત આપી રહ્યો છે . આ પોર્ટફોલિયો માટે તેમનો ભાવ 25 પૈસા , ગોવાના મુખ્યમંત્રી મનોહર પરિકરનો ભાવ 40 પૈસા અને રવિશંકર પ્રસાદનો ભાવ 30 પૈસા છે .

સૌથી જોખમી સટ્ટો જનરલ વી કે સિંઘના સંરક્ષણ પ્રધાન બનવા પર ખેલાઈ રહ્યો છે . બુકીનો આ દાવ સાચો પડે તો તેને રૂ .1 લાખ પર રૂ .1.75 લાખ મળશે . સંરક્ષણ પ્રધાન તરીકે ગોપીનાથ મુંડેનો ભાવ 50 પૈસા છે . અડવાણી અને મુરલી મનોહર જોશીમાં સટોડિયાને રસ છે ? હા . બુકીઓને વિશ્વાસ છે કે , અડવાણી સ્પીકર બને એવી પ્રબળ શક્યતા છે . આ હોદ્દા માટે તેમનો ભાવ 15 પૈસા અને મુરલી મનોહર જોશીનો ભાવ 45 પૈસા છે .

મોદી સરકારમાં અન્ય પ્રધાનોમાં રામવિલાસ પાસવાન (5 પૈસા ) , પીયૂષ ગોયલ અને અનંત કુમાર ( બંને 10 પૈસા ) ના સમાવેશની શક્યતા ઉમા ભારતી અને વરુણ ગાંધી ( બંને 45 પૈસા ) કરતાં વધુ જણાય છે .